Rayon inganyije umukino wa 3 yikurikiranya! Ikizere gikomeza kuyoyoka

Rayon sports inganyije na Etincelles 1-1 kuri stade ya Kigali i Nyamirambo kuri uyu mugoroba, uba umukino wa gatatu inganyije yikurikiranya bikomeza kugabanya amahirwe yo gusatira APR FC bahanganiye igikombe.

Umukino watangiye amakipe yombi afite ishyaka rikomeye, kuko Rayon Sports yashakaga intsinzi ngo ikomeza gusatira APR FC iri ku mwanya wa mbere, mu gihe Etincelles yo yashakaga intsinzi ngo ive mu makipe arwaniraga kutamanuka mu cyiciro cya kabiri.

Rayon Sports yatangiye isatira cyane, rutahizamu w’umunya Mali ahusha ibitego bine byabazwe mu minota 30 ya mbere.

Ku munota wa 32 nibwo Rayon Sports yafunguye amazamu ku gitego cyatsinzwe na Nshuti Savio Dominique, nyuma y’aho Ismaila Diarra yari amaze gucenga umunyezamu ariko umupira uramusiga Nshuti awutsinda neza.

Rayon sports yakomeje guhusha ibitego byabazwe, ariko igice cya mbere kirangira ari 1-0.

Mu gice cya kabiri, Ismaila Diarra yagonganye n’umunyezamu wa Etincelles, bombi baravunika barasimburwa.

Masudi Djuma utoza Rayon yahise yinjiriza mu kibuga Irambona Eric asimbuye Manishimwe Djabel, naho Ismaila Diarra asimburwa na Muhire Kevin.

Nyuma y’iminota ine gusa Muhire Kevin yinjiye mu kibuga yahise ahabwa ikarita itukura we na Habimana Hussein wa Etincelles, aba bari bashyamiranye mu kibuga hagati yabo, amakipe yombi asigara ari abakinnyi 10.

Etincelles yahise itangira guhindura umukino, itangira gusatira ikoresheje ‘contre attaque’.

Byayihiriye yishyura igitego yari yatsinzwe, gitsinzwe na Ndikumana Bodo, ku mupira wahinduwe na Kambale Salita Gentil (Papy Kamanzi) bombi bahoze muri Rayon Sports.

Umukino warangiye amakipe yombi anganyije 1-1, uba umukino wa gatatu Rayon sports inganyije (yanganyije 0-0 na Sunrise, 1-1 na Gicumbi, 1-1 na Etincelles).

Rayon Sports igize amanota 54 mu mikino 25 imaze gukina mu gihe APR bihanganye ifite amanota 58 mu mikino 26 yakinnye. Etincelles yo ihise ifata umwanya wa 11 n’amanota 27.

Abakinnyi 11 babanjemo ku mpande zombi:

Rayon sports:

Ndayishimiye Eric Bakame, Manzi Thierry, Imanishimwe Emmanuel, Tubane James, Munezero Fiston, Mugisha Francois, Kwizera Pierrot, Djabel Imanishimwe, Kasirye Davis, Ismaila Diarra, Savio Nshuti.

Etincelles:

Barthez Danny, Gikamba Ismael, Gasozera Hassan, Nahimana Isiaka, Mugwaneza Pacifique, Habimana Houssein, Nizeyimana Mirraf, Manishimwe Yves, Kambale Salita Gentil, Ndikumana Bodo, Kikunda Patrick.

Photos/R.Ngabo/Umuseke

Roben NGABO
UM– USEKE.RW