Peter Otema yasezeye Rayon, bazana rutahizamu mushya w’i Congo

Peter Otema wari warahawe amazina ya Peter Kagabo ngo akinire u Rwanda nka rutahizamu, yerekeje mu ikipe ya Musanze yaguze amasezerano y’umwaka umwe yari asigaje muri Rayon Sports y’i Nyanza. Uyu mukinnyi yabisikanye n’abandi bakinnyi bashya Rayon yahise izana barimo rutahizamu mushya witwa Lwanzo Tatsopa Augustin ukomoka i Congo.

Olivier Gakwaya umunyamabanga akaba n’umuvugizi wa Rayon Sports yameje ko ubu basinyishije abakinnyi babiri ari bo; Fiston Munezero myugariro bavanye i Burundi ariko ngo w’umunyarwanda na rutahizamu Lwanzo Tatsopa Augustin bakunze kwita Luamba, ukomoka muri repubulika iharanira demokarasi ya Congo.

Gakwaya Olivier yavuze aba bombi basinyishijwe. Atsindagiriza ko Fiston ari umunya Rwanda nubwo yavuye i Burundi. (uyu Fiston yari yakiniye Sunrise ku mukino wa nyuma w’igikombe cyAgaciro).

Muri shampionat y’u Rwanda ikipe yemerewe gukinisha abakinnyi batatu gusa b’abanyamahanga muri 11 babanza mu kibuga. Kuri iki umuvugizi wa Rayon Sports imaze kugira ubu bane avuga ko babitekerejeho.

Gakwaya yabwiye Umuseke ati “Tujya kubazana twari twabitekerejeho neza. Ubu dufite bane. (Luamba, Fabrice, Pierrot, na Kasirye) Abatoza bazakomeza kubakoresha neza ku buryo bose bazatanga umusaruro. Ntitwahubutse tujya kubazana rwose mubimenye.”

Abicishije kuri Page ye ya Facebook, Otema yavuze amagambo yo gusezera ku bakunzi ba Rayon Sports, iherutse kuzana rutahizamu Davis Kasilye na Bodo Ndikumana baza biyongera kuri Pierrot Kwizera biauma Otema yibona hanze.

Otema watangiye kumenyekana mu Rwanda akina mu ikipe ya Kibuye FC ubu yari amaze iminsi yifuzwa n’amakipe arimo na Sunrise y’i Rwamagana ndetse na Bugesera.

Hari amakuru yemeza ko Musanze FC yaguze amasezerano ye muri Rayon Sports kuri miliyoni imwe n’igice y’amanyarwanda

Kuva ahagana mu mpera za shampionat ishize, Rayon Sports imaze kurekura abakinnyi 10 barimo abari ba kizigenza bayo; abo ni uwari Kapiteni wabo Fuad Ndayisenga, ba myugariro Faustin Usengimana, Abuba Sibomana, Karim Nizigiyimana bita Makenzi, abandi nka Robert Ndatimana, Djihad Bizimana, Jean Paul Havugarurema, Aphrodis Hategekimana bita Kanombe, Isaac Muganza ndetse n’umuzamu Gerard Bikorimana.

UM– USEKE.RW