Perezida Paul Kagame yitabiriye inama y’Afrika yunze ubumwe

Perezida w’u Rwanda Paul Kagame yageze Addis Abeba muri Ethiopia ku mugoroba wo kuri uyu wa gatanu aho yitabiriye inama ya 18 isanzwe y’abakuru b’ibihugu na guverinoma y’umuryango w’Afurika yunze ubumwe. 

Nkuko tubikesha ikinyamakuru The Ethiopian Herald, abantu ibihumbi 3000 bateganyijwe ko aribo bazitabira iyi nama  izaba taliki ya 29 n’iya 30 Mutarama ikazaba yitabiriwe n’umunyamabanga mukuru w’umuryango w’abibumbye Ban Ki Moon.

Muri iyi nama biteganyijwe ko kuwa mbere taliki ya 30 Perezida w’u Rwanda Kagame azageza ku bitabiriye iyi nama raporo y’inama ya Busan. Iyo nama yabereye i Busan muri Koreya y’epfo kuva taliki ya 29 Ugushyingo kugeza taliki ya 1 Ukuboza umwaka ushize.

Perezida Kagame yayitabiriye ahagarariye umugabane wa Afurika. Iyo nama yigaga ku mitangire n’imikoreshereze myiza y’inkunga ibihugu bikize bigenera ibikiri mu nzira y’amajyambere.

Abakuru b’ibihugu na guverinoma y’umuryango wa Afrika yunze ubumwe biteganyijwe ko bazanafungura ku mugaragaro inyubako y’icyicaro gishya cy’uyu muryango.

Kubaka iyi inzu byatwaye miliyoni 150 z’amadolari y’Amerika yatanzwe n’igihugu cy’ubushinwa mu rwego rwo gushimangira ubutwererane hagati y’ubushinwa n’umuryango w’Afrika yunze ubumwe.

Imbere y’iyi nyubako hakaba hazubakwa urwibuto rw’abazize ubwicanyi butandukanye bwibasiye ikiremwamuntu harimo n’abazize genocide yakorewe abatutsi mu Rwanda mu 1994.

Muri iyi nama hakaba hazanatorwa Perezida wa komisiyo ya Afurika yunze ubumwe uzasimbura ucyuye igihe umunyegabon Jean Ping uzongera kwiyamamariza uyu mwanya aho azaba awuhatanira n’umunyafrika y’epfo Nkosazana Dlamini Zuma.

Mu bibazo bisuzumirwa muri iyi inama hakaba harimo icy’umutekano muri Somalia ndetse n’umubano urimo urunturuntu hagati ya Sudani na Sudani y’amajyepfo.

Photo Urugwiro

Ubwanditsi
UM– USEKE.COM