P. Gaby na Claire bagiye gushyira hanze Album yabo ya mbere igizwe n’indirimbo 12

Bwa mbere umuhanzi Ngamije Gabriel na mushiki we Claire Ikirezi bagiye gushyira hanze Album yabo ya mbere igizwe n’indirimbo 12 z’amajwi gusa , iyi album ikazaba igizwe n’indirimbo zo kuramya no guhimbaza Imana.

Ngamije Gabriel Semugeshi uzwi nka Pastor Gaby na mushiki we Claire U. Ikirezi, bombi bakaba babarizwa mu muryango Great Commission Ministry(GCM). Ni bamwe mu baririmbyi bazwiho ubuhanga mu njyana zihimbaza Imana ‘Gospel’.

Mu kiganiro na Umuseke Pastor Gaby yavuze ko igihe kigeze ngo bashyire indirimbo zabo hanze nubwo bari basanzwe baririmba zimwe na zimwe ziri kuri iyo album mu bitaramo bajyaga batumirwamo.

Ati “Ubu njyewe na Claire dufite album igizwe n’indirimbo zigera kuri 12 tugiye gushyira hanze. Impamvu twatinze ni uko twabonaga igihe kitaragera ngo dushyire impano zacu hanze mu myaka 15 ishize dukorana.”

Pastor Gaby abajijwe niba we na mushikiwe bitazagera igihe bakazajya mu ndirimbo z’Isi, yavuze ko ibyo barimo babizi. Ko bajya gutangira Gospel bari bazi ko iz’isi zihari.

Ubusanzwe Pastor Gaby na Claire bavukana ari abana barindwi mu ryango wabo, bakaba ari abakobwa bane n’abahungu batatu.

Uko ari barindwi bose hamwe, batanu muri bo bakaba ari abahanzi. Uyu muryango ngo ukomora impano yo kuririmba kuri Se ubabyara witwa ‘Semugeshi John’.

Pastor Gaby yashishikarije abakunzi babo kwitabira album bagiye gushira hanze vuba , bakayumva , bakitabira imbuga nkoranyambaga zabo arimo Facebook, Instagram , n’izindi.

Avuga kandi ko barasaba abakunzi babo gukomeza kubasengera kugira ngo Imana ikomeze ibafashe mu migambi bafite ikomeze gusohora.

Kuri Album y’aba bavandimwe harimo indirimbo zagiye zimenyakana cyane hirya no hino ku maradiyo atandukanye, izo zirimo ‘Tuje kugushima’, umpe akanya Yesu, Wewe ni mungu, Urandutira, n’izindi nyinshi.

Daddy SADIKI RUBANGURA
UM– USEKE.RW