Nizar Khanfir watozaga APR FC yasezeye

Umunya-Tunisia watozaga APR FC, yamaze gusezera abakinnyi n’abakozi bakoranaga, nyuma yo kwegukana igikombe cya Shampiyona 2015-16, no gutsindirwa ku mukino wa nyuma w’Igikombe cy’Amahoro na Rayon Sports.

Kuri uyu wa kane tariki 8 Nyakanga 2016, nibwo APR FC yegukanye igikombe cya Shampiyona idakinnye, kuko Rayon Sports iyikurikiye yatsinzwe na Muhanga FC 1-0, byemeza ko imikino itatu isigaje itakuramo amanota 10 irushwa na APR FC.

APR FC yamenye inkuru yo gutsindwa kwa Rayon iri mu myitozo kuri Stade ya Kicukiro.

Nk’uko twabitangarijwe n’umwe mu bakinnyi ba APR FC, Nizar Khanfir yahise ahamagara abamwungirije, Rubona Emmanuel, Mugabo Alexis, Bizimana Didier na Wilson Byusa uzwi nka Rudifu, bashyira abakinnyi hamwe, avuga ijambo ryo kubashimira uko babanye, anabasezeraho.

Umuseke wagerageje kubaza umunyamabanga wa APR FC, Kalisa Adolphe Camarade niba uyu mutoza atazatoza umukino usoza Shampiyona, adusubiza ko na we yabyumvise, ariko nta baruwa isezera ku kazi uyu munya-Tunisia yahaye ubuyobozi.

Nizar Khanfir w’imyaka 56, yageze muri APR FC tariki 7 Werurwe 2016. Umukino wa mbere yatoje yahise asezererwa na Yanga Africans muri CAF Champions League.

Nubwo yahesheje igikombe cya Shampiyona iyi kipe y’ingabo z’u Rwanda, ntiyishimiwe cyane n’abafana kuko yatsizwe na mukeba Rayon Sports inshuro ebyiri, harimo n’umukino wa nyuma w’igikombe cy’Amahoro.

Roben NGABO
UM– USEKE.RW