Nigeria: Boko Haram yongeye kwica abantu 20

Amakuru atangwa na AFP aravuga ko Boko Haram yicishije amasasu abantu 20 mu Majyarugura ya Nigeria mu Mujyi wa Borno. Ibi babaye nyuma y’uko ngo ingabo za Nigeria zemeje ko zishe abarwanyi ba Boko Haram bagera ku 150, zikaba zarabatsinze ahitwa Adamawa.

Amakuru AFP yahawe n’umwe mu babonye buriya bwicanyi avuga ko abarwanyi ba Boko Haram bateze imodoka enye mu gace ka Jingalta mu bilometero 70 uva Maiduguri bakicamo abantu 20.

Nyuma ngo bahise batwika ziriya modoka, zirakongoka.

Kolo wabonye buriya bwicanyi yemeza ko abarwanyi ba Boko Haram bahise bajya gusahura amazu ari hafi .

Ibiro ntaramakuru by’Abanyamerika Associated Press byemeza ko ku wa Kabiri w’iki Cyumweru abasirikare ba Nigeria bari kumwe n’abasore batojwe kurinda umutekano mu midugudu bagabye igitero kuri Boko Haram bicamo abarwanyi 150.

Muri kiriya gitero kandi babashije kubohoza abana 36 hamwe n’abagore Boko Haram yari yarafashe bunyago.

Mu myaka itandatu ishize Boko Haram ikorera muri Nigeria no mu bihugu baturanye, imaze kwica abantu ibihumbi 20 abandi barenze aba bava mu byabo.

Mu minsi ishize umuyobozi wa Boko Haram Abubakar Shekau yumvikanye anyomoza ibyavugwa ko yapfuye, yemeza ko akiriho kandi imigambi ya Boko Haram ikiri yayindi.

UM– USEKE.RW