Ni iki Inama y’Igihugu y’Umushyikirano ya 13 isigiye Abanyarwanda ?

Inama y’Igihugu y’Umushyikirano ya 13 yari imaze iminsi ibiri, ihuza abayobozi mu nzego zinyuranye z’igihugu, ba rwiyemeza mirimo n’abanyarwanda baba mu Rwanda no mu mahanga muri rusange isize igihugu cyihaye inshingano zirimo izo gushyiraho icyerekezo 2050, gukemura ibibazo by’inguzanyo zihabwa abanyeshuri muri Kaminuza, gukemura ikibazo cy’imihanda ihuza uturere n’ibindi.

Umunsi wa mbere w’iyi nama waranzwe n’ijambo rya Perezida rigaragaza uko igihugu gihagaze, ibiganiro ku mahitamo y’Abanyarwanda, n’ibindi; Byose byagarutse cyane ku kwishimira intambwe u Rwanda rumaze gutera mu guhitamo ibibereye igihugu no kwihesha agaciro, nk’uko insanganyamatsiko y’inama y’igihugu y’umushyikirano ya 13 yabivugaga.

Umunsi wa kabiri wabaye uwo kuganira ku bibazo byugarije u Rwanda muri iki gihe birimo iby’ibikorwaremezo, ejo hazaza h’abaturage, ubuzima cyane cyane icyorezo cya Malaria kirimo kwiyongera, n’ibindi binyuranye.

Minisitiri w’Imari n’Igenamigambi Claver Gatete yatanze ikiganiro cyagaragaje ko u Rwanda rumaze kuva kure mu bukungu, iterambere, umutekano, ubuzima n’ibindi byiciro by’ubuzima.

Ibitekerezo, n’ibibazo abanyarwanda batanze byavanywemo imyanzu 13 yahawe abayobozi b’igihugu nk’inshingano zo kwitaho cyane muri uyu mwaka ugiye gutangira:

1. Gutegura Icyerecyezo cya 2050 kigamije kongera ubukungu kugira ngo Abanyarwanda barusheho kwigira no kwigenera ejo bashaka;
2. Gukomeza gusigasira no kurinda ibyiza twagezeho dukesha Inkiko Gacaca no kurushaho kubungabunga ibindi bimenyetso bya Jenoside yakorewe Abatutsi birimo inzibutso za Jenoside, no kwandika amateka ya Jenoside yakorewe Abatutsi mu Turere dutandukanye, mu Bigo bya Leta, iby’abikorera n’Amadini kugira ngo bikomeze gushyigikira ubumwe bw’Abanyarwanda;
3. Kurushaho kunoza ishyirwa mu bikorwa rya Gahunda ya Ndi Umunyarwanda n’izindi Gahunda zose zigamije komora ibikomere Abanyarwanda batewe n’amateka mabi yaranze u Rwanda, bityo bigafasha Abanyarwanda kurushaho gukunda Igihugu cyabo, gushyira hamwe no gufatanya mu guharanira icyateza U Rwanda imbere;
4. Kongera imbaraga mu gukemura ibibazo by’abaturage, kugira ngo bikemurirwe igihe kandi neza; no kuzamura uruhare rwabo mu bikorwa bibateza imbere, bakarushaho kugira uruhare mu igenamigambi, ikurikirana n’ishyirwa mu bikorwa ry’ibibakorerwa;
5. Kurushaho kunoza imitangire ya serivisi zihabwa abaturage, mu nzego za Leta n’iz’abikorera, Urwego rw’Igihugu Rushinzwe Imiyoborere (RGB) n’Urwego rw’Igihugu Rushinzwe Iterambere (RDB) zikarushaho gukurikirana uko izo serivisi zitangwa no kubikangurira inzego bireba;
6. Kurushaho gukurikirana no kunoza uburyo gahunda z’Igihugu zo kwishakamo ibisubizo (home grown solutions), cyane cyane Gahunda ya Girinka, Umuganda n’izindi gahunda ziteza imbere abaturage zigakorerwa isuzuma rihoraho; kugira ngo zitezwe imbere kandi zirusheho gutanga umusaruro;
7. Kurushaho guteza imbere ubucuruzi bw’ibintu na serivisi hagati y’u Rwanda n’Ibihugu by’amahanga, cyane cyane ibyo muri Afurika;
8. Nk’uko Abanyarwanda babisabye, hagomba gushyirwaho uburyo buhamye bwo kunyomoza ibivugwa ku Rwanda bitari ukuri no kugaragaza isura nyayo y’u Rwanda ishingiye ku byo Abanyarwanda bihitiyemo kandi uguhitamo kw’Abanyarwanda bikubahwa;
9. Kwihutisha ishyirwa mu bikorwa ry’ingamba zo gukumira no kurwanya ku buryo bwose bushoboka indwara ya Malariya yiyongereye muri tumwe Turere tw’Igihugu;
10. Gushishikariza Abanyarwanda b’ingeri zose kugira umuco wo kwizigamira harimo no guteganyiriza iza bukuru no gukoresha ibikorerwa mu Rwanda (Made in Rwanda) no kongera umusaruro w’ibikomoka ku buhinzi n’ubworozi n’ibyoherezwa hanze;Kuri iyi ngingo Minisitiri Claver Gatete yavuze ko ubu Abanyarwanda bagera kuri 90% batizigamira, ndetse n’ubwizigame bw’ababasha kubikora n’ubw’igihugu ngo bukaba ari 14% ugereranyije n’ubukungu bw’igihugu, akavuga ko iyi mibare itabereye u Rwanda n’Abanyarwanda bifuza ejo hazaza heza;
11. Kubaka bitarenze ukwezi kwa Kamena 2016, umuhanda ugera ku Kigo nderabuzima cya Kabaya mu Karere ka Ngororero no kwihutisha inyingo n’iyubakwa ry’umuhanda wa Cyanika-Musanze-Ngororero gutangiza kubaka Umuhanda Ngoma-Bugesera-Nyanza n’indi mihanda ihuza Uturere kugira ngo byorohereze ubuhahirane hagati y’abaturage;Kanyange Christine, Umunyamabanga Nshingwabikorwa w’Akagari ka Kabaya, Umurenge wa Ngororero mu Karere ka Ngororero wasabye ko agahanda k’ibilometero nka 2 kagera ku bitaro by’Akarere, yavuze ko kubera imiterere yako mibi, imbangukiragutabara n’ibindi binyabiziga bitwaye abarwayi byahageraga bigahagarara abarwayi bakagenda n’amaguru, bityo ngo iyubakwa ryako rizafasha abarwayi bagana ibitaro bya Ngororero.Abaturage ba Bugesera, Burera, Gisagara n’ahandi nabo basabye cyane ko imihanda ibahuza n’utundi turere yakubakwa kugira ngo ubuhahirane n’Uturere bahana imbibe burusheho kworoha.
12. Gukemura burundu kandi vuba ikibazo cy’inguzanyo igenerwa abanyeshuri (buruse) itinda kubagezwaho;
13. Gushyiraho ingamba zo guteza imbere ururimi rw’Ikinyarwanda n’indangagaciro z’umuco nyarwanda mu mashuri yose, bigakomeza kwigishwa no mu mashuri yisumbuye, amakuru na za kaminuza.Perezida Paul Kagame yavuze ko hari abenshi basoza amashuri ugasanga nta Kinyarwanda bityo asaba ko cyakwigishwa mu mashuri yose, kandi ntibikureho ko abashaka kukiga mu buryo bwimbitse bakomeza guhitamo amashami acyigisha.

Inama y’igihugu y’umushyikirano y’uyu mwaka yitabiriwe n’abayobozi, n’abaturage mu byiciro binyuranye basaga 1 000, urubyiruko rusaga 3 000 rwari kuri Petit Stade, n’abandi banyuranye bari mu byumba byateguwe i Bugesera, Burera na Gisagara bawukurikiranye hifashishijwe ikoranabuhanga.

UM– USEKE.RW