Ngororero: Impanuka yahitanye 4, naho 10 barakomereka bikomeye

Mu masaha ya mugitondo kuri uyu wa kane tariki 01 Ukwakira, mu Karere ka Ngororero, Umurenge wa Hindiro, Akagari ka Runyinya, Umudugudu wa Murambi, ahazwi nko mu rugabano habereye impanuka ikomeye y’imodoka nto itwara abagenzi (Taxi Mini bus) “Toyota Hiace” yarenze umuhanda, abantu bane (4) bahise bahasiga ubuzima, abandi 10 barimo n’uwari uyitwaye barakomereka bikomeye cyane.

Polisi y’u Rwanda, ishami rishinzwe umutekano wo mu muhanda kugeza ubu ritaramenya imyirondoro y’abaguye muri iyi mpanuka ryatangaje ko yatewe n’umuvuduko ukabije.

Umuvugizi wa Polisi, ishami rishinzwe umutekano wo mu muhanda, SP Jean Marie Vianney Ndushabandi yabwiye Umuseke ko iyi mpanuka yabaye mu masaha ya saa moya n’igice z’igitondo (07h30), ngo ikaba yatewe n’umuvuduko ukabije.

SP Ndushabandi yavuze ko imodoka yakoze impanuka yarimo abantu 15, bane bahita bapfa, abandi 10 barakomereka bikomeye ku buryo batabawe n’indege za kajugujugu bakazanwa mu bitaro i Kigali, naho abandi bane bakaba barimo gukurikiranirwa mu bitaro bya Kabaya.

Yagize ati “Impanuka yatewe n’umuvuduko mwinshi, kubera kwihuta cyane yarenze umuhanda,…imodoka yaguye muri metero nka 70, kandi ari ahantu hari ibiti, iyo aba atihutaga cyane biba byamutangiriye.”

SP Jean Marie Vianney Ndushabandi agasaba abantu kwitwararika cyane cyane muri ibi bihe by’imvura itera ubunyerere.

Venuste KAMANZI
Photos: Social media
Umuseke.rw