Ngoma: Arakekwaho kwica umugore we akamuta mu kiyaga

Kuri Station ya police mu karere ka Ngoma hafungiwe umugabo w’imyaka 59 witwa Kubwimana Vedaste ucyekwaho icyaha cyo kwica umugore we bashakanye byemewe n’amategeko hanyuma umurambo akawujugunya mu kiyaga cya Mugesera cyiri mu Murenge wa Mugesera. Uyu ucyekwa  ni umuturage wo mu Murenge wa Zaza uhana imbibi n’uwa Mugesera.

Abaturanyi ba Kubwimana Vedaste ubu ucumbikiwe kuri station ya Police bavuga  ko yari amaze igihe afitanye amakimbirane n’umugore we. Uyu mugore yaje kuburirwa irengero ariko umugabo we Kubwimana akavuga ko uyu mugore yagiye mu masengesho.

Uwishe uyu mugore yahambiriye umurambo  mu mufuka ajya kumujugunya mu kiyaga cya Mugesera nyuma aza kubonwa n’abarobyi barimo gutega imitego, nabo bakaba  babitangarije  ubuyobozi ndetse n’abashinzwe umutekano.

Nkuko twabitangarijwe n’umuyobozi w’umurenge wa Mugesera Bizumuremyi J.Damascene ggo ibikorwa nkibi ntibyari bisanzwe muri uyu Murenge.

Yagize ati: Ubusanzwe nta bikorwa nk’ibi by’ubwicanyi  birangwa muri aka gace gusa ubwo bigaragaye natwe tugiye kwicara turebe icyo dukora kugira ngo umutekano ukomeze umere neza.”

Yakomeje asaba abaturage kujya batanga amakuru k’ubuyobozi mu gihe hari ahagaragaye amakimbirane  mu ngo kuko ibi byazajya bifasha mu gukumira ibi byaha.

Yagize ati:  “Ndahumuriza abaturage mbabwira ko nta gikuba cyacitse ariko ndabasaba kujya batanga amakuru k’ubuyobozi mu gihe hari ahagaragaye amakimbirane bakajya babitubwira igikorwa kibi cyitarakorwa kandi ndanabizeza ko umutekano ari wose.”

Nkuko biteganywa n’amategeko ahana y’u Rwanda, mu gihe iki cyaha cyahama uyu mugabo Kubwimana Vedaste yakatirwa gufungwa burundu.

Elia BYUK– USENGE

ububiko.umusekehost.com