Muhanga: Abagororwa bamaganye ubwicanyi bwakorewe Umuryango wa Ngayaberura

Imfungwa n’abagororwa bo muri gereza ya Muhanga,  bibumbiye  mu ihuriro  Anti-crime bateguye  umunsi wo kwamagana ubwicanyi buherutse  gukorerwa  mu Murenge wa Byimana  mu karere ka Ruhango aho umuryango w’abantu batandatu  wishwe  ijoro rimwe.

Iki  gikorwa cyo kwamagana  ubwicanyi cyabereye  muri Gereza ya Muhanga, kuri uyu wa  gatanu taliki ya 22/Kamena/2014  kigamije  kwerekana ko ibyo  ukekwaho kwica  umuryango w’abantu batandatu yakoze ari igikorwa  kigayitse haba kuba gikoze  by’umwihariko no kuri Sosiyete nyarwanda muri rusange.

Uhagarariye  Club anti-Crime  muri gereza ya Muhanga, Ruzigana Emmanuel yatangaje ko iyi gahunda yaje gufasha  imfungwa n’abagororwa kwiyakira  kwicuza ndetse no gusaba imbabazi  ku byaha bitandukanye bakoze, bityo ko  kwamagana ubu bwicanyi  ari ukwereka Abanyarwanda ko biyemeje  inzira yo kuva mu byaha no kugororoka  kandi ko  bitazasubira inyuma.

Yagize ati:″ Kuva aho iyi gahunda ya anti-crime  itangiriye, nta mfungwa cyangwa se umugororwa muri iyi gereza  wari  watoroka, bose bemeye ibyaha basaba imbabazi, bategereje  kurangiza ibihano’’

Nyandwi Athanase ashinzwe kugororan’uburenganzira bwa muntu, muri gereza ya Muhanga,  yavuze ko  bateguye iyi gahunda yo kwamagana ubwicanyi  bwa korewe mu karere ka Ruhango, kugira ngo imiryango yaje gusura  ibugeze hirya no hino mu mirenge iwabo,  kandi ko kubiceceka  bisa  no gushyigikira   uwakoze ubwicanyi.

Ati: ‘’Gukora icyaha birababaza  ariko iyo bibaye insubiracyaha biba agahomamunwa, ukekwaho gukora ubwicanyi n’ubundi yarafungiwe ibindi byaha.’’

Umuyobozi wa Gereza ya Muhanga, Bisengimana  Eugene  yavuze ko  bafite gahunda  yo gukwirakwiza  ubutumwa bwa Club Anti-Crime muri za gereza zitandukanye  zo mu gihugu kubera ko  aho yatangiriye imfungwa n’abagororwa  bagenda bahinduka  bigatuma  bahindura  n’imyumvire y’abagenzi babo batari biyakira ngo basabe imbabazi.

Gereza ya Muhanga  ifite abagororwa  ibihumbi bitatu  birenga, muri bo  300 nibo bari muri club anti- crime,  biteganyijwe ko  kuwa gatanu w’icyumweru gitaha iyi gereza  izamurika ibikorwa( Open day) aho abaturage bazajya gusura serivisi zitandukanye zikorera muri iyi gereza.

Barateganya kandi no gusura  ibigo by’amashuri yisumbuye  aho abagororwa bazatanga ubutumwa mu mashuri cyane cyane ku rubyiruko  bavuga uruhare rwabo muri jenoside yakorewe abatutsi 1994, n’ibindi byaha bakoze.

MUHIZI Elisee 

UM– USEKE.RW/Muhanga.