Muhanga: 15,9% by’abaturage bafite amashanyarazi

Mu  nama  ubuyobozi bw’Akarere  ka Muhanga  bwagiranye n’intumwa za Banki y’Isi zikorera mu turere dutandatu  twatoranyirijwe kunganira Umujyi wa Kigali harimo na Muhanga, Umuyobozi w’aka karere  Mutakwasuku Yvonne yazitangaje ko  15 ku ijana ry’abatuye Muhanga ubu bafite amashanyarazi.

Mayor Mutakwasuku Yvonne yabwiye  izi ntumwa za Banki y’Isi ko mu mishinga inyuranye akarere ka Muhanga  gafite ariko itarazamuka ngo igere ku rwego bifuza, harimo ibikorwaremezo bijyanye n’amashanyarazi, imihanda, isuku n’isukura, asaba ko ibi aribyo Banki y’isi yashoramo amafaranga.

Mutakwasuku  akomeza avuga ko  muri ibi bikorwaremezo usanga umubare w’abaturage bafite amashanyarazi  ari wo ukiri hasi ugereranyije n’ibindi bikorwa biteza imbere abaturage.

Yagize ati: “Amashanyarazi naboneka, ubucuruzi buziyongera bityo abaturage bacu batera imbere.’’

Mesky Brhane  wari uhagarariye intumwa za Banki y’Isi, mu Karere ka Muhanga, yavuze ko  mu gutera inkunga uturere twatoranyijwe, bazashingira ku mishinga buri karere  kazaba kahisemo.

Asanga ibi aribyo bizatuma  utu turere  tuzamuka vuba tukagera ku rwego rw’Umujyi wa Kigali, ariko akongeraho ko  amafaranga yo  kubikora  agomba kubanzirizwa n’ibiganiro  hagati  ya Banki y’isi n’uturere ubuyobozi bw’ igihugu  bwahisemo.

Yagize ati:’’ Nta mafaranga  dushobora gutangaza  uyu munsi arebana n’ibikorwa byose tweretswe, icyo tugendereye ni ugutega amatwi tukumva icyo uturere twifuza, ikibazo cy’amafaranga kizaza nyuma.’’

Akarere ka Muhanga, ni kamwe mu turere  icumi dukennye cyane, aho abaturage 53% bari munsi y’umurongo w’ubukene,  abaturage  ibihumbi 3 nibo akarere ka Muhanga gateganya guha amashanyarazi  mu ngengo y’imari  y’umwaka wa 2014-2015, ku buryo nibura  abaturage  ibihumbi 20  bazabona  umuriro w’amashanyarazi  mu myaka mike iri imbere.

Muri aka karere  niho harimo kubakwa urugomero rwa Nyabarongo ruzatanga  ingufu z’amashanyarazi  zingana na megawati  28  bitarenze  ukwezi  k’Ukwakira uyu mwaka wa 2014.

Aya mashanyarazi naboneka hakiyongeraho n’inkunga  Banki y’isi iteganya gutanga, ikibazo cy’ibura ry’amashanyarazi kizaba kigiye gukemuka.

Izi ntumwa za Banki y’isi  zikaba zizasura  uturere twa Nyagatare,  Rusizi, Rubavu, Musanze, Huye, na Muhanga ari natwo igihugu cyatoranyije.

MUHIZI ELISEE

UM– USEKE.RW/Muhanga.