Mu ndirimbo 12 za Christopher akundamo imwe kurusha izindi

Muneza Christopher umuhanzi mu njyana ya R&B mu Rwanda, akaba n’umwe mu bahanzi bakunzwe cyane muri iki gihe, ngo mu ndirimbo amaze gushyira hanze kuva yatangira ubuhanzi uko ari 12 akundamo imwe kurusha izindi.

Ku itariki ya 15 Gashyantare 2014 nibwo Christopher yashyize hanze album ye ya mbere iriho indirimbo 11, aza kongera gukora indirimbo ya mbere izajya kuri album ya kabiri ayita “Agatima” mu ntangiriro za Nyakanga 2014.

Mu ndirimbo za Christopher zagiye zikundwa cyane n’abantu benshi ndetse zanatumye amenyekana, nta n’imwe afite akunda nk’uko akunda iyo yise ‘Agatima’ ari nayo aheruka gushyira hanze.

Mu kiganiro yagiranye na Umuseke, Christopher yatangaje ko mu ndirimbo zose afite iyo yumva yishimira kurusha izindi ari iyo aheruka gushyira hanze.

Yagize ati “Mu ndirimbo mfite zose iyo njye nkunda kurusha izindi ni ‘Agatima’. Si ukuvuga ko izindi nazo ntazikunda, gusa iyo ndimo kuyumva numva harimo itandukaniro n’izindi zose naba narakoze”.

Zimwe mu ndirimbo z’uyu muhanzi zakunzwe cyane harimo, Iri joro, Habona, Ndabyemeye, Byanze ndetse n’izindi nyinshi.

Christoher ukorera mu nzu itunganya muzika nyarwanda izwi nka Kina Music iyoborwa na Ishimwe Clement, yakomeje abwira Umuseke ko album ye ya kabiri izaba iriho indirimbo nziza kurusha iya mbere.

Ni ku nshuro ya kabiri Christopher yitabira irushanwa rya Primus Guma Guma Super Star, dore ko yaryitabiriye bwa mbere mu mwaka wa 2013 ariko akaza kuvamo mu mubare w’abahanzi 5 bavuyemo mbere. Ubu noneho ari mu bahanzi 7 bahatanira kuzegukana umwanya wa kane ku itariki ya 30 Kanama 2014.

Umva indirimbo ya Christopher yise ‘Agatima’ akunda kurusha izindi zose afite.

[youtube url=”https://www.youtube.com/watch?v=s03RXxKNrrE” width=”560″ height=”315″]

Joel Rutaganda

UM– USEKE.RW