Moïse Katumbi yatangaje ko yisunganye na ‘Opposition’
Moïse Katumbi Chapwe, umugabo uri mu bakize cyane kandi bakunzwe muri Congo Kinshasa
Mu kiganiro yagiranye n’abanyamakuru ku cyumweru tariki 03 Mutarama 2015 Moïse Katumbi yavuze ko yagiye mu ruhande rutavugwa rumwe na Leta ya Perezida Kabila rwitwa Front Citoyen 2016.
Uyu mugabo wari Guverineri w’Intara ya Katanga akegura umwaka ushize ndetse mu kwezi kwa cyenda 2015 akava mu ishyaka PPRD riri ku butegetsi, kuva icyo gihe ntiyigeze ashinga ishyaka rye cyangwa ngo agire irindi ajyamo, gusa ubu yatangaje aho aherereye.
Ku cyumweru aganira n’abanyamakuru Katumbi Chapwe yahamije ko amaze kwisunga abari muri ‘Front Citoyen 2016’ nk’uko bitangazwa na Tribune Congo.
Front Citoyen 2016 ni ihuriro ryashyizweho n’abatavugarumwe na Leta, bamwe mu bagize Sosiyete Civile hamwe n’abandi bantu b’abanyepolitiki.
Icyo iri huriro rigamije ngo ni ukubuza ivugururwa ry’Itegeko Nshinga n’amatora ya Perezida n’abagize Inteko ateganyijwe muri uyu wa 2016.
Katumbi, umugabo uzwi cyane kandi ufite abakunzi benshi kubera ibikorwa bye yaguriye no mu mupira w’amaguru, mu mpera z’uyu mwaka ushize yamaganye itabwa muri yombi ry’abantu bagaragaje kudashyigikira politiki ihari ubu ya Perezida Kabila, hamwe no kubatera ubwoba uko ariko kose.
UM– USEKE.RW
English