Min. Busingye yakiriye mugenzi we wa Gambia

Nyuma yo kwakira no kuganira na mugenzi we w’ubutabera muri Gambia kuri uyu wa kabiri, mu kiganiro yagiranye n’abanyamakuru Minisitiri Johnston Busingye yavuze ko nubwo muri Africa y’uburengerazuba hari ibihugu bimwe bigicumbikiye bamwe mu bakekwaho Jenoside ariko kugeza ubu nta numwe muri bene aba uraboneka muri Gambia.

Nyuma y’ibiganiro by’aba bayobozi Min Busingye yabajijwe niba hari imikoranire hagati y’ubutabera bw’ibihugu byombi mu guta muri yombi ababa bakekwaho ibyaha bya Jenoside bahunguye muri Gambia.

Yasubije ko muri Gambia kugeza ubu nta muntu barabwirwa ko yihisheyo yarasize akoze Jenoside mu Rwanda.

Ati “Yenda byashoboka ko hari uriyo, ariko mugenzi wanjye namubajije abwirako nawe ntawe arumva”

Minisitiri Busingye akaba n’intumwa nkuru ya Leta yavuze ko ahubwo icyo batekereza ari uburyo habaho ubufatanye n’ibihugu byo muri Africa y’Iburengerazuba n’ahandi muri Africa mu gushakisha ababa babyihishemo bakoze Jenoside bagafatwa.

Ati “Turifuza ko ba Minisitiri b’ubutabera mu bihugu bya Africa twakorana mu gufata abo bantu kuko kubika umuntu ufite ibyaha akwiye kuba yarakurikiranyweho si uguhemukira abanyarwanda gusa ni no guhemukira isi yose ndetse n’ ikiremwa muntu.”

Ms Fatima Singhateh Minisitiri w’ubutabera wa Gambia ari mu Rwanda aho yaje mu rugendo rugamije kureba imikorere y’inzego zifite inshingano zo kurwanya ruswa mu Rwanda kugira ngo agire amasomo ahavana yakoreshwa iwabo.

Umubano w’u Rwanda na Gambia mu by’ubutabera ngo nibwo ugitangira kuko uru nirwo ruzinduko rwa mbere Minisitiri waho w’ubutabera agiriye mu Rwanda.

Usibye ibijyanye na no kurwanya ruswa, Minisitiri w’ubutabera wa Gambia ngo aramurikirwa imikorere y’ubutabera mu Rwanda kuko ngo mu bimugenza harimo kureba aho u Rwanda ruvuye n’aho rugeze no kureba amasomo Gambia yaruvanaho mu butabera.

Joselyne UWASE
UM– USEKE.RW