Mexique: Umunyamakuru yiciwe mu gace yari amaze iminsi akozeho inkuru

Kuri iki Cyumweru Umunyamakuru wari uri kumwe n’umugore we n’umwana wabo bo mu Mujyi wa Veracruz muri Mexique  yaraye arasiwe muri aka gace gafatwa nk’ahantu hateje akaga ubuzima bw’Abanyamakuru muri Mexique. Ngo yari amaze iminsi asohoye inkuru ivuga kuri aka gace.

Uyu munyamakuru wari uri kumwe n’umuryango we yarashwe ubwo yasohokaga muri restaurant avuye gusangira n’inshuti n’umuryango.

AFP ivuga ko uyu mugabo yitwa Ricardo Monlui Cabrera. Ngo nta wundi mu bagize umuryango we wakomeretse ariko ngo bahahamutse, bakaba bajyanywe kwitabwaho n’abaganga,

Guhera muri 2012 kugeza ubu ngo muri aka gace hamaze kurasirwa Abanyamakuru icyenda.

Monlui yari umwanditsi w’Ikinyamakuru cyo mu gace yabagamo kitwa El Politico kandi ngo yari amaze igihe gito yanditse inyandiko isesenguye kuri politike y’agace atuyemo.

Umwe mu bantu baganiriye n’ubugenzacyaha muri aka gace yavuze ko nyakwigendera yishwe avuye gusangira n’inshuti ze zari zamutumiye n’umuryango we.

Uyu muntu yavuze ko abishe uyu munyamakuru bamurashe ubwo yari asohotse n’umuryango we bagiye kwinjira mu modoka.

Ishyirahamwe ry’abanyamakuru batagira umupaka ryemeza ko kugeza ubu Mexique ari cyo gihugu cya mbere muri America y’epfo kishe Abanyamakuru benshi kuko kuva muri 2000 kugeza muri 2016 hamaze kwicwa abanyamakuru 99.

Jean Pierre NIZEYIMANA
UM– USEKE.RW