Lil G agiye gushyira hanze album yise ‘UMUBYEYI’.

Karangwa Lionel umuhanzi uzwi muri muzika nyarwanda nka Lil G, arratangaza ko mu minsi mike aza kuba ashyize hanze umuzingo ‘Album’ azita ‘Umubyeyi’ izaba iriho indirimbo zigera ku icumi.

Lil G agiye gushyira hanze iyi album izaba ari iya kabiri amuritse kuva yatangira muzika, iya mbere yari yayise ‘Nimba umugabo’, ayitirira imwe mu ndirimbo yari yarakoranye n’umuhanzi Ngabo Medard uzwi nka Meddy.

Mu kiganiro na UM– USEKE, Lil G yatangaje ko nta gihindutse album ye ya kabiri azayimurika ku itariki ya 20 Werurwe 2014 kuri Petit Stade i Remera ubwo uwo munsi bizaba ari n’umunsi we w’amavuko.

Bamwe mu bahanzi bazaza gufasha Lil G mu kumurika album ye ya kabiri harimo ,Riderman, Mavenge Soudi na Mani Martin, kuko aribo bahanzi aherutse gukorana nabo indirimbo. Abandi bazaza muri icyo gitaramo yakomeje atangaza ko bazamenyekana mu minsi iri imbere. Kuri uwo munsi nibwo Lil G azaba yuzuza imyaka 20 y’amavuko.

Joel Rutaganda
ububiko.umusekehost.com