Licklick nsanzwe nzi, si we numvise muri ‘Ntawamusimbura’ ya Meddy- Oda Paccy

Uzamberumwana Pacifique uzwi nka Oda Paccy, ni umwe mu baraperi bamaze igihe mu muziki w’u Rwanda. Avuga ko indirimbo Licklick aherutse gushyira hanze za Meddy na The Ben iya Meddy yise ‘Ntawamusimbura’ itamuryoheye nkuko asanzwe amenyereye imicurangire ye.

Ubusanzwe Paccy ni n’umwe mu bahanzi bazamukiye mu biganza bya Producer Licklick usigaye wibera muri Amerika ndetse banafitanye umwana.

Nyuma y’aho ashyiriye ubutumwa ku rubuga rwe Instagram agita ati “Nsanzwe nemera production ya Licklick ariko aha natakaye. ‘Ntawamusimbura’ Meddy na The Ben ni abantu babiri batandukanye ntitukabagereranye”.

Ibi byatumye benshi mu banzwe bamukurikirana batangira kuvuga ko yashatse gusuzugura Meddy imbere ya The Ben kandi bose ari abahanzi bakomeye ndetse banafite umubare munini w’abafana mu Rwanda ugereranyije n’abandi bahanzi bakora umuziki.

Kuri we avuga ko impamvu yatumye yandika ayo magambo bitari uburyo bwo kuba yarashatse kwerekana ko Meddy adashoboye. Oyaaaa!!!!!!, ngo ahubwo byari ukuvuga ko indirimbo zabo zitaryoshye kimwe. Ko iya Ben ariyo yumvise ikoze neza kurusha iya Meddy.

Paccy yabwiye Umuseke ko ubusanzwe afata producer Licklick nk’umuntu uzi akazi akora kandi anafite uburambe muri ako kazi. Gusa kuri iyi nshuro atanejejwe n’indirimbo yakoreye Meddy nubwo ari nziza ku rundi ruhande ku muntu upfa kumva indirimbpo gusa utazi uburyo indirimbo nziza ibiba biyigize.

Ati “Meddy ni umuhanzi w’umuhanga peee!!!ariko kuri njye mbona The Ben ashoboye cyangwa se hari ibyo amurusha mu buryo bw’imiririmbire. Kuri iyi nshuro indirimbo ye nshya itandukanye n’izindi yari amaze igihe ashyira hanze ntekereza ko na Licklick atari ubu buryo twari dusanzwe tumwumva mu micurangire ye”.

Paccy washyize hanze amashusho y’indirimbo ye yise ‘Igitego’, yakomeje avuga ko ubutumwa buyirimo atigeze avuga ko bureba Licklick. Ahubwo ari buri muntu wese wagiye ahura n’ibyo yaririmbye.

Ko indirimbo ze zose abantu bahita bazisanisha n’urukundo rwigeze kuba hagati ye na Licklick nyamara adakora umuziki kubera guhangana ahubwo akora umuziki kubera gushaka kugira umusanzu atanga kuri rubanda.

Joel Rutaganda

UM– USEKE.RW