Libya: Abimukira bashaka kujya i Burayi, bamwe bacuruzwa nk’abacakara ku isoko 

Umuryango ushinzwe gukurikirana ibibazo by’Abimukira ku isi “International Organization for Migration” watangaje ko abimukira bashaka kujya i Burayi bavuye muri Africa y’Abirabura, bagurishwa ku isoko nk’abacakara.

Uyu muryango utangaza ko hari abantu benshi bagezweho n’iki kibazo bavuga ko bafashwe n’imitwe yitwaje intwaro n’abantu babafasha kwambuka bajya i Burayi, ngo bakabashimuta bakabafunga nyuma bakajya kubagurisha nk’abacakara.

Bavuga ko ubu bucuruzi bukorerwa ahantu hatandukanye mu mijyi yo muri Libya.

Uyu muryango ukomeza uvuga ko iyo bamaze kugurwa bagirwa nk’imbohe n’ababaguze nk’uko umuntu azirika ihene aba yaguze ku isoko.

Abo birabura bagurwa mu biciro bitandukanye bitewe n’ubumenyi buri wese afite, abagezweho n’icyo kibazo bavuga abazi imyuga nko gusiga irange, kudoda n’indi bagurishwa ku giciro cyo hejuru kurusha abandi badafite umwuga n’umwe bazi.

Uyu muryango wemeza ko hari amagana y’abantu baturuka muri Afurika yo munsi y’ubutayu bwa Sahara bagurishijwe muri mwene ubwo bucuruzi.

Umwimukira ukomoka muri Senegal yabwiye uyu muryango witwa IOM ko yagurishijwe muri ubwo buryo mu majyepfo y’umujyi wa Sabha muri Libya.

Yahise afungirwa ahantu hari abandi basaga 100 na bo bari bagizwe imbohe bamaze kugurishwa.

Uyu muryango kandi uvuga ko abakobwa bagurwa n’abakiliya bihariye bo muri Libya, bakabajyana mu ngo zabo kubagira abacakara basambanywa ku gahato.

Hari abategekwa guhamagara imiryango yabo ngo izane amafaranga yo kubagomboza ngo bayabura, ababaguze na bo bakongera bakabagurisha.

Andi makuru avuga ko bakubitwa, bagakorerwa ihohoterwa rishingiye ku gitsina abandi bakicwa. Umuryango IOM utabariza byihutirwa ari muri iki kibazo, uvuga ko ibi bikorwa ngo bihangayikishije cyane.

BBC

UM– USEKE.RW