Leta igiye gukura abakene kuri ‘serumu’ ibafashe byose izakurikirane impinduka

Mu biganiro byiga icyakorwa ngo gahunda za Leta zigamije guteza imbere abaturage zigere ku ntego zazo, byabereye muri Sena ku wa kane w’icyumeru gishize, Minisitiri w’Ubutegetsi bw’Igihugu, Francis Kaboneka yatangaje uburyo bushya Leta yatangiye gukoresha buzakura abaturage mu bukene, ngo aho gutanga inkunga y’intica ntikize ‘serumu’, umuturage azahabwa byose by’ibanze ‘minimum package’ akurikiranwe nyuma y’imyaka runaka barebe icyo yagezeho.

Minisitiri Kaboneka avuga ko iyi gahunda yatangijwe mu mirenge 30 igize igihugu, umuturage akazahabwa ubufasha bukomatanye, aho kumuha inkunga imwe runaka mu zo Leta yajyaga itanga, nyuma y’igihe bakazareba iterambere yagezeho.

Ati “Twabitangije mu mirenge 30, ni ukuvuga ngo izi gahunda zose, iya Girinka, iya mutuelle, …twazihuriza gute ku muntu umwe tukamukurikirana nibura mu myaka itatu tukaba turamucukije tukavuga tuti ararangije.”

Yasabye abayobozi kugira uruhare muri iyi gahunda yatangijwe nk’igeragezwa muri buri murenge umwe mu karere kamwe muri 30 tugize igihugu.

Ati “Igituma twafashe iki cyemezo, mbere wasangaga dutatanya, umuntu ukamuha aka ngaka katari bugire ikintu kamukiza, akagamuma kuri serumu, turavuga ngo reka tumuhe aka ga ‘package’ (inkunga igizwe n’ibintu byinshi), tukavuga ngo reka tumukurikirane umwaka umwe, ibiri turebe ko ashobora gutera intambwe akagira aho agera ashobora kwifasha.”

Minisitiri Kaboneka avuga ko abantu bakwiye guhindura imyumvir ebitewe n’uko usanga abantu barangije Kaminuza na bo usanga hari abashaka gufashwa, bigasa nk’aho ibyiciro by’ubudehe byakemuye ikibazo cy’akazi.

Umunyamabanga wa Leta muri Minisiteri y’Ubutegetsi bw’Igihugu, Dr Alvera Mukabaramba yasobanuriye Umuseke iby’iyi gahunda mu buryo burambuye.

Avuga ko ikirimo kunozwa harebwa niba umuturage yajya akurikiranwa mu myaka itatu cyangwa icyo gihe kikaba cyagabanuka.

Ati “Umuturage azajya ahabwa mutuelle, bamuhe amatungo, inka cyangwa amatungo magufi bitewe n’icyo afitiye ubushobozi, ahabwe umuntu umukurikirana (umuturage baturanye uri mu cyiciro cy’ubudehe cyisumbuyeho), twavugaga kumurikirana imyaka itatu ariko turacyabikosora kuko bibaye imyaka itatu ntibyagera ku bandi vuba.”

Bitewe n’uko amatungo yororka mbere y’icyo gihe ngo igihe cyo kumukurikirana gishobora kuzava ku myaka itatu bikaba umwe cyangwa umwe n’igice.

Icyo kiswe minimum package, ngo kirimo imirimo akora muri gahunda ya VUP, aho umuturage akorera hagati y’amafaranga 1000 n’’ 1500, igihe bakora ngo kikaba kizongerwa nibura kikagera ku minsi 70 ku mwaka (ubwo umuturage azaba yakoreye nibura Frw 70 000), azajya ahabwa Frw 80 000 ari yo azaguramo ya matungo magufi we yumva afitiye ubushobozi.

Uyu muturage ariko ngo ashobora no kujya mu nzego ziguriza amafaranga, yakoze umushinga, noneho muri uwo mwaka ngo bazajya bakurikirana barebe ibyo uwo muntu yagezeho ahite ava muri icyo cyiciro ajye mu kindi.

Dr Mukabaramba avuga ko iyi gahunda izaba ireba abaturage bakennye cyane bari mu cyiciro cya mbere cy’ubudehe bafite imbaraga zo gukora, kuko ngo icyo gihe bazajya banahabwa amahirwe igihe mu gace barimo haje imirimo babe ari bo bakoreshwa.

Ati “Muri package harimo no kumuhugura kugira ngo abone ubumenyi bwo gucunga neza ibyo yabonye, kumuhugura mu by’imari kuguza, uko yakwita ku matungo, ni ukumuhuguraagahabwa ubumenyi butandukanye kugira ngo azagere kuri urwo rwego rundi.”

Mu Rwanda ingo 376 192 zituwemo n’abantu 1 480 167 (16%) babarizwa mu cyiciro cya mbere cy’Ubudehe (abakennye cyane). Minisiteri y’Ubutegetsi bw’Igihugu ivuga ko irimo yiga uburyo bw’ikoranabuhanga buzajya bwifashisha indangamuntu mu kugenzura ko ibigenewe umukene byamugezeho, bidaheze mu bayobozi b’’ibisambo’ nk’uko Minisitiri Kaboneka yise abatinyuka kurya ibya rubanda rugufi tariki ya 17 Ugushyingo 2016.

HATANGIMANA Ange Eric
UM– USEKE.RW