Kuzamura imishahara y’abakozi ba Minisiteri bizongera miliyari 3,3 ku ngengo y’Imari

*Mu bakozi bongejwe umushahara harimo n’abacungagereza aho umukozi muto yongereweho 45%.

Mu kiganiro n’Abanyamakuru gisobanura imwe mu myanzuro yaraye ifashwe mu byemezo by’Imana y’Abaminisitiri, Umunyambanga Uhoraho muri Minisiteri y’Abakozi ba Leta yavuze ko umwanzuro wo kuzamura bamwe mu bakozi bo hasi n’abayobozi babo muri za Ministeri na bimwe mu bigo bya Leta, uzongera miliyari 3,3 ku ngengo y’Imari ya Leta.

Samuel Murindwa Umunyamabanga Uhoraho muri MIFOTRA yavuze ko uyu mwanzuro w’Inama y’Abaminisitiri ugendanye n’ibyemezo byafashwe mu 2012 mu bijyanye na “P Policy” ijyanye no guca ubusumbane mu bakozi ba Leta.

Icyo gihe “P Policy” ngo yavanye igipimo fatizo cy’umushahara w’abakozi kuri 250 (index) kigera kuri 300 ku bakozi basanzwe n’abakozi bo hasi babafasha, ndetse iva ku gipimo cya 250 ishyirwa ku gipimo cya 330 ku nzego z’ubuyobozi bw’aba bakozi bato (Abayobozi b’Amashami).

Murindwa avuga ko muri icyo cyemezo hemejwe ko izo nzego zizagenda zizamurwa bitewe n’uko igihugu kizabona ubushobozi, kuko ngo hari izindi nzego za Leta ziri ku bipimo fatizo by’umushahara biri hejuru ni ukuvuga ku bipimo bya 400 na 500, bityo ngo ibyakozwe ni muri urwo rwego rwo kugira ngo bagabanye ubusumbane.

Yagize ati “Icyemzo cyafashwe ku munsi w’ejo, za nzego zabanje kuzamurwa zijya kuri 300 aho urwego rw’abakozi basanzwe (Professionals) bashyizwe kuri 350, naho abayobozi b’amashami bavuye ku bipimo bya 330 bashyirwa kuri 400, byabaye ku nzego zari hasi.”

Yavuze ko ibi bitareba abayobozi bakuru muri za Minisiteri n’ibyo bigo, ahubwo ngo bireba abayobozi bato, abakozi basanzwe n’ababafasha mu rwego rwo kubafata neza. Inzego zari zisanzwe ku bipimo fatizo bya 400 na 500 zo ngo muri P Policy byemejwe ko zitazazamuka.

Murindwa yavuze ko mu mibare ifatika, abakozi basanzwe (professionals) n’ababafasha (supporting staff) ngo bongereweho 16% ku mushahara wabo, naho abayobozi b’amashami barebwa n’icyo cyemezo bongereweho 20% by’umushahara wabo.

Icyo cyemezo ngo kirareba ahanini za Minisiteri na bimwe mu bigo kuko ngo ni zo zari zasigaye ku bipimo fatizo by’umushahara biri hasi.

Murindwa yavuze ko bitewe n’uburambe abakozi bafite mu kazi batanganya umushahara n’abatangira kuko ngo iyo umuntu amaze imyaka itatu akora ku mushahara we hiyongeraho 15% nyuma hakajya hiyongeraho 10%, bivuze ko kongera umushahara kuri abo bakozi barebwa n’uyu mwanzuro w’Inama y’Abaminisitiri bazabara bahereye ku mushahara buri wese yari agezeho.

Yavuze ko ku bakozi bandi ba Leta nk’Abarimu, Abapolisi n’abandi bivugwa ko bafite umushahara muto, na bo hari icyakozwe.

Abarimu ngo kuva mu 2012 ntibabonye ibyitwa Horizontal Promotion (Kuzamurwa mu ngazi ntambike), ahubwo ngo mu mpera z’ukwezi kwa Kamena 2016 bahawe 10% kongeraho 3% byose ngo byongeye ku ngengo y’Imari ya Leta ho amafaranga y’u Rwanda miliyari 7,8.

Abapolisi bato kugeza ku ufite ipeti rya IP, ngo bazamuriwe umushahara, aho umuto cyane umushahara wazamutse kugera kuri 58%. Kuva kuri IP kuzamura kugeza kuri Komiseri Mukuru wa Polisi mu gihugu, na bo ngo umushahara wabo wazamutse guhera tariki ya 1 Nyakanga 2016.

Murindwa yavuze ko mu Nama y’Abaminisitiri yateranye kuri uyu wa gatatu tariki 10 Kanama 2016, abacungagereza bazamuriwe imishahara aho umuto cyane yazamuriweho 45%.

Umuseke washatse kumenya niba ari cyo gihe cyiza cyo kuzamura imishahara ku bakozi ba Leta kandi bimaze iminsi bivugwa ko mu gihugu hari amapfa yateje inzara kuri bamwe mu baturage, Murindwa avuga ko cyari cyo gihe cyo kuzamura abakozi bato bitewe n’ubushobozi igihugu gifite.

Ati “Navuga ngo yego, kuva igihe iyi politiki y’imishahara yagiriyeho mu 2012, amwe mu mahame y’ingenzi yashingiweho tuvuga ngo bizahinduka harimo ‘affordability and sustainability’, aho uvuga ngo tuzazamura imibare fatizo igihugu cyabonye ubushobozi, icyifuzo cyari ukuvuga ngo bose bangane ariko ntibahise bangana, na n’ubu ntabwo bangana ariko bijyanye n’ubushobozi bwagiye buboneka hari icyagiye gikorwa kugira ngo bihinduke.

Kuva mu 2012 kugeza ubu biragaraga ko ubushobozi bw’ubukungu bw’igihugu bwagiye buzamuka, mu 2012 imishahara n’ibindi bigenerwa abakozi byatwaraga 41,5% by’amafaranga igihugu kinjiza hatarimo abaterankunga, kubera ko igihugu gishingira ku bushobozi gifite imbere kugira ngo gihembe.

Ubu aho bigeze imishahara ifata 22% bingana na ½ cy’aho twari turi. Bisobanura neza ko ubushobozi bwo  kongera aya mafaranga burahari niyo mpamvu byanakozwe, kuko imishahara y’abakozi ugereranyije n’imisoro igihugu kinjiza birabitwemerera kuko bigaragara nk’ibishoboka n’ubwo amafaranga menshi ajya mu mishanga yubaka igihugu.

…Kongerera umushahara umukozi wo hasi mu gihe cy’inzara (mu gihugu), … ubu byakabaye byiza ko umukozi wo hasi yongezwa umushahara, …ikindi cyiswe inzara MINAGRI niyo iri mu rwego rwo kugisubiza, …ariko ku isesengura rijyanye n’ihame ry’ubushobozi n’uburyo burambye nk’uko politiki y’imishahara yari yabisobanuye icyo gihe, navuga ko ari cyo gihe gikwiriye dushingiye ku mibare uko ibigaragaraza kuko hari icyahindutse.”

HATANGIMANA Ange Eric
UM– USEKE.RW