Ku kibazo cy’Inzara, Min Stella Ford yasabye abayobozi kwishyira mu mwanya w’abayoborwa

*Min Stella Mugabo yasabye abayobozi b’inzego z’ibanze gukorera igihugu aho gukorera amanota,
*Yasabye buri wese gutekereza icyo yakora ku myanzuro y’Umwiherero wa 13
*Yanenze abayobozi babeshya ko hari ibyo bakoze…

Ministiri Stella Ford Mugabo ushinzwe ibikorwa by’Inama y’Abaminisitiri yagaragarije abayobozi b’uturere bari mu itorero ibibazo bamwe muri bo bakomeje kwitwaramo nabi birimo ikibazo cy’abana b’inzererezi bafatwa bakajyanwa mu bigo bibacunga, ariko ntibakurikiranwe ngo babazwe icyabateye iyo myitwarire n’ikibazo cy’inzara cyugarije bamwe mu batuye mu Burasirazuba aho yasabye aba bayobozi kwishyira mu mwanya w’abafite iki kibazo.

Ni itorero rije rikurikira Umwiherero w’abayobozi Bakuru wanafatiwemo imyanzuro 14 irimo gukemura ikibazo cy’abana b’inzererezi n’abandi bahohoterwa, ikibazo Umukuru w’Igihugu yanagarutseho muri uyu mwiherero abwira abayobozi ko cyavuzweho kenshi, ariko kikaba kitabonerwa umuti.

“Gukaza umurego mu gushyira mu bikorwa ingamba zo kubungabunga uburenganzira bw’abana n’izo guca ikibazo cy’imirire mibi muri bo, gukumira impamvu zituma abana bajya mu mihanda cyangwa bata ishuri, no guca burundu icuruzwa ry’abantu,” ni umwe mu myanzuro yavuye muri uyu mwiherero.

Uyu mwiherero wanagarutsweho cyane na Minisitiri Stella Ford Mugabo ubwo yagezaga impanuro ku bayobozi baherutse gutorwa mu matora y’inzego z’ibanze yabaye muri Gashyantare na Werurwe.

Stella Ford Mugabo yavuze ko muri uyu mwiherero w’abayobozi bakuru herekanywe amashusho agagaraza ubuzima bw’abana bo ku muhanda n’abana b’abakobwa batewe ibikomere bitandukanye, ariko ko byagaragaje intege nke z’abayobozi mu gukemura ibibazo by’abana.

Yavuze ko aya mashusho yagaragaje imyitwarire idakwiye abayobozi n’umuryango nyarwanda. Yavuze ko muri uyu mwiherero hemeranyijweho ko abantu bose barebera bakanahishira abahohotera abana, by’umwihariko abayobozi batazihanganirwa.

Minisitiri wagarutse ku nkuru y’umwana w’umukobwa w’imyaka 12 wasanzwe mu bitaro bya Muhima afite umwana w’umwaka umwe, yavuze ko batewe agahinda n’ibyakorewe uyu mwana wababwiye ko nyuma yo guterwa inda n’uwo yakoreraga yamwirukanye yagera imbere y’umubyeyi we na we akamwirukana.

Stella Ford yavuze ko ubwo hakorwaga ubushakashatsi bwagaragaje izi ntege nke z’abayobozi mu kurera u Rwanda rw’ejo, yavuze ko basuye ikigo cyakira abana b’inzererezi, ariko ko batunguwe n’uburyo aba bana bafatwamo.

Yavugaga iyi nkuru agaragaza ko yakoze ku mitima ya benshi bayibonye, yavuze ko uyu mwana nyuma yo kwirukanwa n’umubyeyi yagiye gutanga ikirego kuri Police na yo ikamwamaganira kure.

Minisitiri ati “Ntiyashoboraga gusubira hariya (aho yakoreraga) kuko na ho bari bamwirukanye nabi, yagiye kuri Police ararega, Police iti “va aha wa ndaya we”, baramufata bamujyana muri cya kigo.”

Stella Ford wanenze iyi myitwarire ya Police, yavuze ko mu gufata abana, bari bakwiye kujya babanza bakamenya icyateye umwana kuza mu muhanda cyangwa kuba inzererezi, kuko mu bana 15 babajijwe, batanu bonyine ngo ni bo bakurikiranywe bakabazwa impamvu yatumye bazanwa muri iki kigo.

Ati “Noneho ukibaza imyaka ibiri umwana ari muri iki kigo, nta n’uwababajije impamvu bahari… ibyo bikakwereka uruhare rwacu ndetse nk’abayobozi tubishyira ku ruhande, wibaze ari nk’umwana wawe “ese byagenda gute?”.”

Yavuze ko ibi biteye agahinda kuko no mu bana basanze barera abandi, bose ari abana batarengeje imyaka 15.

Ati “Ibyo ni byo bibazo dufite uyu munsi, biteye agahinda ariko na none bikagenda bisubira muri za ndangagaciro duhora tuvuga.”

Ku kibazo cy’Inzara, ati “Ibaze uko wicara ku meza ufata breakfast, lunch…”

Minisitiri yasabye abayobozi kwishyira mu mwanya w’abayoborwa. Mu minsi ishize havuzwe ikibazo cy’inzara yugarije bamwe mu baturage bo mu Ntara y’Uburasirazuba ndetse bivugwa ko bamwe muri bo batangiye gusuhukira mu bihugu bihana imbibi n’u Rwanda.

Minisitiri Stella Ford yavuze ko ubuyobozi bwo ku rwego rw’igihugu bwageneye ibiribwa Abanyarwanda birukanywe muri Tanzania bikajya bibagezwaho nyuma ya buri byumeru bitatu.

Mu igenzura risanzwe rikorwa n’Abaminisitiri (buri Minisitiri afite akarere akurikirana), Stella Ford yavuze ko ubwo basuraga aba Banyarwanda batujwe mu turere twa Kayonza na Nyagatare batunguwe no kuba ibiribwa baheruka guhabwa ari ibyo mu Ukwakira 2015.

Agaragaza ibyo babonye, ati “…Ukagerayo abantu bakakureba, ukabona bateye impuhwe kubera inzara, batubwira ko babahaye ibyo kurya byo mu byumweru bitatu inshuro imwe gusa bararekera, ikibabaje ntibafite n’aho guhinga.”

Minisitiri yavugaga ko nyuma y’iri genzura aba baturage bahawe andi mafunguro agizwe na Kg 2 z’ibigori na Kg 1 y’ibishyimbo kuri buri muntu (bizamara ibyumweru bitatu), yasabye aba bayobozi bashya kumva uburemere bw’ibibazo by’abo bayobora.

Ati “Wowe (muyobozi) niba wicara ku meza yawe ugata ifunguro rya mu gitondo, irya ku manywa n’irya nijoro, tekereza wa muntu wahaye bya bilo bibiri.”

Minisitiri wavugaga bigaragara ko atewe agahinda n’ibi, yasabye aba bayobozi guharanira gusangira n’abo bayora umutungo w’igihugu.

Martin NIYONKURU
UM– USEKE.RW