Kigali: Abatuye mu kajagari bagiye gufashwa gutura mu nyubako zigezweho

Mu rwego rwo gushyira mu bikorwa gahunda y’Umujyi wa Kigali, impuguke mu bukungu ikomoka muri Sri Lanka, Dr Darim Gunesekera arimo gukora inyigo ku buryo bushya buzafasha abatuye nabi mu kajagari kandi bitajyanye n’icyerekezo cy’umujyi, kuba batura mu nzu zigezweho ziciriritse zizaba zubatse n’ubundi aho bari batuye.

Dr Darim Gunesekera, abinyujije mucyo yise “Real Estate Exchange”, ugenekereje ni nk’isoko ry’amazu, yabashije gufasha abatuye mu kajagari iwabo muri Sri Lanka, no muri Philippines gutura mu nzu z’imiturirwa bashoye ubutaka bwabo gusa.

Muri uyu mushinga, hashyirwaho ikigega yita ‘Real Estate Investment Trust (REIT)”, ikigega cy’ishoramari abaturage batuye mu kajagari mu gace runaka binjiramo bamaze kwemera gushora ubutaka bari batuyeho muri icyo kigega, hanyuma bagahabwa imigabane muri icyo kigega. Nyuma, binyuze mu kigo cy’Imari n’imigabane bwa butaka buri muri cya kigega bugashyirwa ku isoko, abashoramari n’ibigo by’imari bifite amafaranga bigashora imari muri cya kigega.

Iyo cya kigega kimaze kubona amafaranga, hubakwa inzu ijyanye n’icyerekezo cy’Umujyi muri ka gace kari akajagari, hanyuma ba baturage bakava mu butaka bashoye muri cya kigega ‘REIT’, bakajya gutura muri ya nzu igezweho, aho bahabwa aho gutura heza ku giciro gito cyane, ndetse izo nzu zikaba izabo bwite. Ubutaka bimutseho nabwo bushorwamo imari, byose bikagirira inyungu ba bashoramari bashyize amafaranga mu kigega by’umwihariko, n’umuturage washoye ubutaka bwe mu kigega.

Iyi gahunda ikiri mu nyigo mu Rwanda, ngo yatanze umusaruro mwiza muri Sri Lanka, Philippines; ndetse ikaba iri mu nyigo mu Buhinde na Kenya.

Robert Mathu, umuyobozi w’ikigo gishinzwe isoko ry’imari n’imigabane ry’u Rwanda “Capital Market Authority (CMA) avuga ko Leta n’ikigo ayoboye by’umwihariko bazafasha mu gushyiraho amategeko agenga ubwo bucuruzi n’imikorere yabwo, by’umwihariko ariko arengera ba baturage b’abakene kugira ngo bataryamirwa, imitungo yabo ibandikweho koko kandi koko babone inzu ku giciro gito.

By’umwihariko ariko, CMA ni nayo izafashe cya kigega ‘REIT’ kubona amafaranga yo gushora mu bikorwa binyuze mu kugurisha imigabane yacyo.

Mathu ati “Nyuma y’ukwezi kumwe cyangwa abiri, (Dr Darim Gunesekera ) azatanga raporo igaragaza niba mu buryo bw’ubukungu bishoboka ko mu bice byubatse mu kajagari bitajyanye n’icyerekezo cy’Umujyi wa Kigali haboneka izo nzu ku giciro gito, ku buryo byafasha umujyi wa Kigali gushyira mu bikorwa icyerekezo cy’umujyi.”

Iyi raporo ni nayo ngo izagaragaza uko bizakorwa, hagendewe ku miterere y’u Rwanda na Politiki z’ubutaka mu Rwanda, ndetse niba n’umuturage ushatse kuva muri iri soko ry’amazu yagurisha umuungowe.

Asobanura ku nyungu z’abantu bazaba bashoye muri iki kigega, Mathu yavuze ko abashoramari bazungukira mu bukode bw’amazu, n’inyungu ku bikorwa bizashyirwa aho abaturage bazaba bimutse.

Umujyi wa Kigali uvuga ko imiturire y’akajagari itajyanye n’icyerekezo cy’umujyi ari kimwe mu bibazo Umujyi ufite, aho usanga abaturage batuye mu nzu zitajyanye n’icyerekezo cy’umujyi, kandi ngo banakoresha nabi ubutaka.

Umuyobozi w’Umujyi wa Kigali Fidel Ndayisaba, ariko avuga ko uyu mushinga wa Dr Darim Gunesekera uzafasha cyane Umujyi wa Kigali kuko ibyo avuga hari ahandi yabikoze kandi bigatanga umusaruro.

Dr Darim Gunesekera, we ngo yizeye ko kuba umushingawe waramaze kwakirwa neza na Leta, ngo n’abaturage bazawumva vuba kuko u Rwanda ari igihugu kigendera kuri gahunda.

Kugeza ubu umujyi wa Kigali ngo utuwe n’abaurage Miliyoni imwe n’ibihumbi bisaga 200, ndetse bikaba biteganyijwe ko mu mwaka wa 2040,uzaba utuwe n’abasaga Miliyoni eshatu n’ibihumbi 800. Iyi ikaba ariyo mpamvu ngo umujyi wa Kigali ushyigikiye gahunda zigamije kunoza imiturire.

Vénuste KAMANZI
UM– USEKE.RW