Kenya: Kenyatta yavuze akababaro aterwa na Ruswa iri mu gihugu cye

Israel- Perezida wa Kenya Uhuru Kenyatta yanenze cyane abaturage b’igihugu cye kubera ruswa yo hejuru, amacakubiri n’ibindi bikorwa bigayitse, aho yasozaga uruzinduko rw’iminsi itatu muri Israel.

Ubwo yagezaga ijambo ku Abanyakenya baba mu gihugu cya Israel, Perezida Kenyatta yavuze ko ikintu giteye agahinda n’isoni ari uko igihugu cyabo cyakataje mu bintu bibi.

Ibintu bibi yavugaga birimo ruswa yafashe intera yo hejuru, ivangura ndetse n’imvugo z’ibitutsi ngo zamaze no kugera no mu banyapolitike.

Yavuze ko bibabaje cyane kuko ibyo byose biri muri iki gihugu kandi Imana yari yarabahaye igihugu cyiza.

Yagize ati: “Twebwe nk’Abanyakenya, Imana yaduhaye igihugu cyiza inshuro 20 kurusha iki ngiki turimo (Israel). Ariko iyo tujyenda usanga igihugu cyuzuye imiborogo n’ubujura.”

Yakomeje agira ati “Abanyakenya dufite ubuhanga bwo kwiba, bwo gutukana, nubwo gukora ibindi bintu bikojeje isoni biteye n’agahinda ndetse no kugira amacakubiri.”

Yavuze ko iki gihugu gifite ubukungu, ariko kubera ikibazo cya ruswa yamaze kuba nk’icyorezo mu bayobozi n’abaturage ngo biragoranye gutera imbere.

Yavuze ariko ko bagomba kwigira ku gihugu cya Israel uburyo cyateyemo imbere.

Mu mwaka ushize Kenyatta yirukanye Abaminisitiri batanu n’abandi bayobozi bo mu nzego zo hejuru kubera kuvugwaho ruswa.

Callixte NDUWAYO
UM– USEK.RW