Kagame yashimiye Global Fund ku musanzu itanga mu kurwanya SIDA n’ibindi byorezo

Mu nama nyobozi ya 37 y’Umuryango ‘Global Fund’ yitabiriwe n’abanyamuryango 260, Perezida Paul Kagame yashimiye uyu muryango ku bufatanye bwiza ufitanye n’u Rwanda mu kurwanya ibyorezo nka SIDA n’Igituntu, n’ibindi.

Perezida Kagame yavuze ko ‘Global Fund’ ari umufatanyabikorwa mwiza w’u Rwanda muri gahunda yo guhindura ubuzima bw’Abanyarwanda.

Ati “Kubera ubwo bufatanye, ubu Abanyarwanda benshi babona imiti indwanya ubwandu bwa SIDA,…imfu zikomoka ku Gituntu na Malaria zaragabanutse cyane,… ndetse ibi byatumye Ikizere cyo kubaho cy’Abanyarwanda cyiyongeraho imyaka irenga 20.”

Perezida Kagame yavuze ko ibyagezweho byose bitari gukunda iyo hatabaho ubufatanye busesuye mu rwego rwo kuzamura ubuzima burambye.

Ati “Uwavuga ko Global Fund  ari umufatanyabikorwa wagaragaje inkunga ikomeye mu mateka yacu ntiyaba abeshye. Gukorana mu gukemura ibibazo by’ubuzima bigaragaza ko dufite ubushobozi bwo gukemura n’ibindi bibazo isi ifite.”

Yavuze ko ‘Global Fund’ yazanye uburyo nyabwo bwo gukorana kandi butikanyiza budakwiye gufatwa nk’ubusanzwe.

Perezida Kagame ashimira inkunga y’ikigega Global Fund, yavuze ko izakomeza gufasha u Rwanda mu kuramira ubuzima hirya no hino ku isi.

Ati “Kugira ngo ikigega Global Fund gikomeze gukora neza, birasaba gukomeza gukora neza, gitanga umusaruro,…Mu kuzamura urwego rw’ubuzima mu bihugu aho kwikorera imishinga yayo, bituma Global Fund igera kuri byinshi kurutaho.”

Yashimiye kandi by’umwihariko uburyo ikigega Global Fund gishyira imbaraga mu gukorera mu mucyo no kugaragariza abantu icyo amafaranga yakoreshejwe.

Ubuyobozi bwa Global Fund burakorera inama mu Rwanda mu gihe, iki kigega kiri guhangana n’ibibazo byo kubona amafaranga yo gushora mu bikorwa n’imishinga gifite mu bihugu bitandukanye hirya no hino ku isi byo guhangana n’icyorezo cya SIDA, Igituntu na Malaria.

Hagati y’umwaka wa 2011 na 2013, ‘Global Fund’ yagombaga kuba Miliyari 13 z’amadolari ya America, hakaboneka Miliyari 11.70 gusa. Hagati y’umwaka wa 2014-2016, bwo ngo hagombaga kuboneka Miliyari 15 ariko tariki 08 Kamena 2016 ubwo twakoraga inkuru ivuga kuri ibi bibazo hari hamaze kuboneka Miliyari 12 gusa.

Amafoto @ Village Urugwiro

UM– USEKE.RW