Impunzi ngo ntizigomba kubaho zitegereje gutamikwa nk’ibyana by’inyoni… – `Min. Mukantabana

*Impunzi zifite imbaraga n’ubwenge bwazifasha kubaho,
*Hari amahirwe igihugu cyazicumbikiye gifite zakoresha.

Minisitiri ushinzwe imicungire y’ibiza n’impunzi Mukantabana Seraphine mu muhango wo gufungura ku mugaragaro ibikorwa remezo by’ubuvuzi mu nkambi ya Mahama mu cyumweru gishize, yasezeranyije impunzi zarenze ikigero cyo kwiga ko zigiye guterwa inkunga mu gukora imishinga ibyara inyungu, kugira ngo izabafashe kubaho badategeye amaso imfashanyo kandi bafite ubwenge n’amaboko yo gukora, ngo ntibakwiye kubaho batamitwa gusa.

Minisitiri yabwiye impunzi ko hari gahunda yo gufasha ibitekerezo by’imishinga ishobora kubafasha kwibesha bagakoresha ubwenge n’imbaraga bafite ntibakomeze guhora bateze amaboko badategereje gutamikwa kuko ngo bitazahoraho.

Ati: “Mu rwego rwo kugira ngo ubuzima bwanyu bumere neza hari ubundi bufasha bugiye kuzabagenerwa kugira ngo umuntu wese yewe kwirirwa yicaye ngo abe umutwaro aho ari, muhaguruke mutekereze ku buzima bwanyu kuko ntabwo muzahora mubaho mwicaye mufashwa, mutamikwa nk’ibyana by’inyoni  mufita amaboko, mufite ibitekerezo. Ibyo byose mutangire mwige uko bigomba gukoreshwa.”

Yabasezeranyije ko azasubira mu nkambi ya Mhama areba imishinga ishobora kubyara inyungu, kandi ifitiye inyungu benshi izahita iterwa inkunga.

Ati: “Nzagaruka hano nje kugira ngo  buri wese ambwire, menye  icyo agamije gukora kugira ngo nibiba ngombwa aterwe inkunga.”

Minisitiri Mukantaba avuga ko bagomba kujya bishyira hamwe bagahuza imbaraga n’ibitekerezo kugira ngo bakore umushinga ushobora gufasha benshi ukabagirira akamaro ukakagirira n’igihugu cyabacumbikiye.

Impunzi zivuga ko izaba ari ingingo y’ingirakamaro kuko ngo mu nkambi hari benshi baba bicaranye ibitekerezo bishobora kuvamo ibikorwa by’ingirakamaro ariko bakabura uwabafasha kubibyaza umusaruro.

Claver Nyabyenda umwe mu mpunzi z’Abarundi ati: “Iyo ngingo izoba ari nziza pe, kuko hano harimo abantu bafite ubuhinga butandukanye bwo gukora ibintu byinshi, urumva babafashije bakaja barabona ibikoresho ndetse n’amasoko byabafasha gutera imbere ntibabeho bategereje ziriya mpungure baduha.”

Minisitiri avuga ko bashyigikira n’imishinga y’abantu batari impunzi ariko bashobora gukorana n’impunzi ikazifasha gutera imbere no gukoresha ubwenge n’imbaraga baba bafite.

Mu nkambi y’impunzi z’Abarundi ya Mahama ituwemo n’impunzi zisaga ibihumbi 55, higanjemo abagore n’abana abenshi usanga nta kazi bafite batunzwe n’ibyo bagenerwa n’imiryango mpuzamahanga ibafasha.

Gusa hari n’abandi baba baragerageje gukora imirimo itandukanye ibyara inyungu nko gucuruza boutique, Me to U, gukora utuntu dutandukanye tw’ubukorikori nko kuboha inkoko, ibyibo ,abogosha,aberekana amafilime n’imipira abakora ama restaurant n’indi mirimo, kandi yose bavuga ko ibunganira mu kubaho.

Tariki 26 Mutarama 2017 nibwo mu nkambi y’impunzi z’Abarundi ya Mahama, mu karere ka Kirehe hatashywe inyubako zigezweho zizatangirwamo serivise z’ubuzima, igikorwa cyari abayobozi batandukanye na Minisitiri Mukantabana Seraphine wari umushyitsi mukuru.

Callixte NDUWAYO
UM– USEKE.RW