Impamvu Leta itinya kurwanya cyangwa kwemera Ubutinganyi

Ubutinganyi (abaryamana bahuje ibitsina) mu Rwanda ni ikintu kimaze gutera intambwe ndende ku buryo bamwe batangiye no gutangaza ku mugaragaro mu bitangazamakuru ko bifuza kubana byemewe n’amategeko.

Mu bice nka Nyamirambo, Kacyiru, Kicukiro, Kanombe, mu baririmbyi, mu banyamideri, mu bakinnyi, mu nzego nyinshi, usanga habarizwa Abatinganyi batihishira rwose kuko bazi ko nubwo abantu benshi batabakunda ariko ntawatinyuka kubahohotera kuko amategeko y’u Rwanda atemera kuba wahohotera umuntu uwo ariwe wese, cyane cyane noneho ushingiye ku bitekerezo bye, uwo ariwe, icyo aricyo, aho akomoka, ururimi cyangwa idini kuko ibyo aribyo byahembereye urwango rwaje kubyara amahano ya Jenoside yakorewe Abatutsi.

Ni kenshi Minisitiri w’Ubutabera akaba n’intumwa nkuru ya Leta yagiye abazwa impamvu amategeko y’u Rwanda atemera cyangwa ngo ahane ubutinganyi.

Agasubiza ati “Amategeko y’u Rwanda yemera gusa ko gushyingiranwa kuba hagati y’umuntu w’igitsina gabo n’uw’igitsina gore bagejeje imyaka y’ubukure, ibindi amategeko yacu ntabwo abyemera.”

Iki gisubizo ariko buri gihe gisiga urujijo kubadakozwa iby’ubutinganyi ndetse n’Abatinganyi ubwabo.

Ku ruhande rumwe hari abatinganyi bavuga bati “Niko twavutse, ni uburenganzira bwacu gukunda uwo ushaka, ahubwo amategeko natubohore tubashe gushyingiranwa n’abo dukunda.”

Aba batinganyi bakora inama, barasohokana bakora ibikorwa nk’iby’abakundana basanzwe n’ubwo bagitinya kubigaragaza ku karubanda cyane kuko baba batinya ko bahohoterwa cyangwa bagacibwa mu miryango.

Ku rundi ruhande hakaba Abanyarwanda benshi cyane badakozwa iby’ubutinganyi kuko bitahoze mu muco Nyarwanda, ndetse bikaba bitanajyanye n’amahame ya Gikirisitu cyangwa ya Kislamu amadini afite abayoboke benshi cyane mu Rwanda, kuko abemera Imana imwe barenga 95% mu Rwanda, n’ubwo Leta y’u Rwanda idashingiye ku idini iryo ariryo ryose nk’uko Itegeko Nshinga ribivuga.

Aba rero bumva hakagiyeho amategeko ahana ubutinganyi kuko kuba bidegembya kandi bakaba ngo bafite imiryango ikorana nabo ifite amafaranga menshi bituma bakururiramo n’urundi rubyiruko.

Kuki mu Rwanda Abatinganyi badahabwa uburenganzira cyangwa ngo bahanwe?

Leta yose itinya abaturage

Abahanga mubya Politike bavuga ko ikintu cya mbere umuyobozi agomba gutinya no kubaha ari abaturage kuko iyo bakwanze ingaruka ziba nyinshi.

Ubutinganyi rero nk’ikintu kidashyigikiwe n’abanyarwanda benshi usanga Leta itinya kubwemera kubera ko abaturage bashobora kutanyurwa n’icyo cyemezo, bakaba bakirwanya cyangwa bigateza akavuyo mu gihugu.

Kandi byagaragaye ko Abanyafurika batihanganira na gato kubona abatinganyi kuko hari mu bihugu bimwe na bimwe bagiye batwikwa ari bazima, abandi bakicwa nabi. Na hano mu Rwanda ngo hari aho bajya bahohoterwa cyane cyane iyo bashatse kugaragaza urukundo rwabo kukarubanda.

 

Uburenganzira bwa muntu

Mu mpamvu kandi nanone zitera ubwoba Leta y’u Rwanda bigatuma idahana ubutinganyi nubwo ari ikintu abaturage benshi badashyigikiye kandi na Leta ibona ko kiri konona umuco ishinzwe kurinda, ni ibihano yashyirirwaho n’ibihugu n’imiryango mpuzamahanga.

Uburenganzira bw’Abatinganyi bushyigikiwe cyane n’ibihugu byo mu Burengerazuba bw’isi bifatiye runini ubukungu bw’u Rwanda na Leta y’u Rwanda muri rusange.

Ubutinganyi busa n’ubwamaze kwinjizwa mu burenganzira bwa muntu kandi ibihugu n’imiryango nterankunga ntikozwa ikitwa kubangamira uburenganzira bwa muntu.

Hari ibihugu binyuranye muri Africa birimo na Uganda duhana imbibi byagerageje kurwanya Ubutinganyi ariko bibonye ko ingaruka zigiye kuba mbi birabihagarika kuko bari bagiye kubihagarikira inkunga.

Ibihugu byinshi bya Africa rero usanga bitinya guhana ubutinganyi kugira ngo bititeranya n’ibihugu byo mu Burengerazuba bw’isi.

Ivangura n’ingaruka zagize mu Rwanda

Ku itariki 17 Gicurasi 2013, mu rwego rwo kwizihiza umunsi mpuzamahanga wo guhangana n’urwango rugirirwa Abatinganyi, abaryamana n’ibitsina byombi n’abahinduza ibitsina (International Day against Homophobia, Biphobia and Transphobia) uwari Ambasaderi w’Ubuholandi mu Rwanda Leoni Cuelenaere yakiriye Abatinganyi iwe mu rugo i Kigali barasangira.

Nyuma yo gusangira no gusabana nabo, Tariki 18 Kamena 2013 yasohoye inyandiko kuri ku rubuga rwa Minisiteri y’Ububanyi n’amahanga y’Ubuholandi kuri ‘blog’ y’uburenganzira bwa muntu avuga ku mibereho y’Abatinganyi mu Rwanda.

Muri iyi nyandiko yise “Ubutinganyi mu Rwanda ntibwemewe ariko ntibunahanwa n’amategeko” (Homosexuality in Rwanda, untoward but not illegal), Ambasaderi Leoni Cuelenaere avuga ko kubera uburyo ivangura ryashenye u Rwanda, ngo Leta y’u Rwanda yirinda icyitwa ivangura iryo ariryo ryose.

Ati “Ubutinganyi mu Rwanda si ikintu uhura nacyo buri munsi, ibi birasobanura urwego bihanganirwaho hano. Ihungabana ryasizwe na Jenoside (yakorewe Abatutsi) yo mu 1994, aho abantu bishwe kubera ko babarizwa mu bwoko (group) runaka, byatumye ubu u Rwanda ruzi indaruka mbi z’ivangura iryo ariryo ryose.

Iyi niyo mpamvu nyamukuru ituma batigaragaza cyane ahubwo ibyabo bikomeza kuba ubuzima bwabo bwite (privacy) mungo zabo. Nubwo mu baturanyi ba Uganda Abatinganyi bafite ibibazo, iki ntabwo ari ikibazo gikomeye cyane mu Rwanda.

Ibi ariko ntibivuze ko Abatinganyi borohewe mu Rwanda kuko abenshi usanga bahisha abo aribo kubera ubwoba bwo gucibwa mu miryango. Abanyarwanda bacye cyane nibo bashobora kwihanganira gukomeza kuba inshuti n’abaryamana bahuje ibitsina. Ikibazo ni ukureba ngo hari uburyo Ubutinganyi bwarushaho kwakirwa cyane muri Sosiyete? Iyi niyo mpamvu ya gahunda yo ku itariki 17 Gicurasi, kandi bizakomeza no mu myaka iri imbere.”

Iri ni ihurizo rikomeje kuri Leta y’u Rwanda kuko ifite inshingano zo kurinda umuco gakondo w’Abanyarwanda, nubwo ngo umuco ukura ibyo Abanyarwanda badashaka gutira mu mico y’ahandi Leta iba igomba gukora uko ishoboye ntibyinjire, ariko nanone ntawe uhungabanyijwe nabyo.

UM– USEKE.RW