Ibyo gutora Abarinzi b’igihango byasubiwemo bihereye hasi

Kuri uyu wa kane tariki 21 Nyakanga 2016, Komisiyo y’Igihugu y’Ubumwe n’Ubwiyunge, yasobanuriye abagize inzego zizatoranya zikanemeza Abarinzi b’Igihango, amabwiriza mashya azabigenga, nyuma y’aho abari batowe mu mwaka ushize batemewe bitewe n’uko ngo amabwiriza atubahirijwe uko bikwiye.

Fidel Ndayisaba Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, yavuze ko kongera gutoranya Abarinzi b’Igihango bihereye hasi byakozwe bitewe n’ingorane abari bashinzwe gushyira mu bikorwa iyi gahunda bahuye na zo.

Indi mpamvu ngo ni ibihe bidasanzwe by’amatora mu buyobozi bw’inzego z’ibanze byatumye Komite ya Ndi Umunyarwanda ku rwego rw’Igihugu isaba Minisitiri w’Intebe ko icyo gikorwa gisubirwamo mu rwego rwo kugitunganya neza no guha amahirwe abandi benshi.

Yavuze ko ngo bizatanga umwanya wo kongera gushishoza niba abari bashyizwe kuri urwo rutonde bujuje ibisabwa, no kureba ko hari abandi bazamurwa.

Yagize ati “Twavuga ko ari nk’inshuro ya kabiri iki gikorwa kibaye, ariko birumvikana ko ku rwego rw’akagari, umurenge n’akarere hakagombye kuba Abarinzi b’Igihango, ariko ntabo dufite bemejwe.”

Kubera ko ngo bari batowe ariko ntibamurikwe cyangwa ngo bemezwe, akazi kakozwe ngo ntabwo ari imfabusa kuko kazaherwaho mu kwemeza abari batowe cyangwa abandi bashya bujuje ibisabwa bakinjira.

Umurinzi w’Igihango ni nde? Atorwa hagendewe ku biki?

Nk’uko byasobanuwe na Komisiyo y’Igihugu y’Ubumwe n’Ubwiyunge, Umurinzi w’Igihango ni umuntu wakoze ibikorwa by’indashyikirwa bifite inyungu rusange ku bantu, kuva mu 1990 kugeza uyu munsi.

Uyu muntu ngo agomba kuba afite indangagaciro nyarwanda, zijyanye n’umuco, guca bugufi, kwiyoroshya, kwanga no kurwanya akarengane kandi akaba yaragize uruhare mu kurwanya amacakubiri, ashobora kuba agifite ubuzima cyangwa yarapfuye.

Ku rwego rw’akagari, Abarinzi b’Igihango bazemezwa mu Nteko rusange y’Abaturage babifashijwemo n’Umunyambanga Nshingwabikorwa wako, uhagarariye abagore n’uhagarariye urubyiruko, abayobozi b’imidugudu yose y’akagari na Perezida wa Njyanama yako.

Hazagenderwa ku bintu bitatu, kuba abo batoranyijwe bafite ubuhamya bwiza mu muryango, kuba yaragize uruhare mu bikorwa bifasha abandi, bitavangura kandi bishyira imbere inyungu rusange, no kuba yarafashije abaturanyi n’Abanyarwanda muri rusange kwiyubaka, kwiyunga no gukira ibikomere.

Abo nibagera ku rwego rw’umurenge kuri ibyo bigenderwaho ku rwego rw’akagari haziyongeraho kuba ibikorwa bye ari ibikorwa biramba kandi biteza imbere imibanire n’imibereho y’abantu bari aho bikorerwa, ikindi ngo ni uko igikorwa kigomba kuba ari umwimerere nyiracyo ari we wakitekerereje.

Abazatoranywa kuba Abarinzi b’Igihango ku rwego rw’akarere, ibikorwa byabo bisa n’ibyo byo ku murenge ariko hakiyongeraho ko byihariye, bigafasha Abanyarwanda kuva mu bibazo by’ingutu bikomoka ku mateka banyuzemo, nko kuba byafasha imfubyi, abapfakazi, abacitse ku icumu rya Jenoside yakorewe Abatutsi, cyangwa abo amateka agaragaza ko basigaye inyuma.

Hazaba hari n’Abarinzi b’Igihango bazatoranywa mu Banyarwanda baba hanze (Diaspora), ibyo bizakorwa na Unity Club iyoborwa na Mme Jeanette Kagame, Minisiteri y’Ububanyi n’Amahanga, Komisiyo yo Kurwanya Jenoside na Komite za Diaspora.

Aba na bo kimwe n’abo ku rwego rw’akarere nibagera ku rwego rwo gutoranywamo Abarinzi b’Igihango ku rwego rw’Igihugu, kuri ibyo bikorwa haziyongeraho ko igikorwa kizaba cyareze imbuto kigera ku bantu benshi cyane. Batoranywa n’inzego zinyuranye harimo za Minisiteri, Inama y’Igihugu y’Abagore, n’Ibiro bya Mme Mme Jeanette Kagame, bazemezwa na Komite Nshingwabikorwa ya Ndi Umunyarwanda.

Fidel Ndayisaba avuga ko Umurinzi w’Igihango uretse kuzaba ari umuntu utumirwa mu nama, akaba azanahabwa Certificat, ngo nta gihembo cyihariye agenewe, ariko ngo akarere kazashyira mu nshingano zako ko Abarinzi b’Igihango bagira imibereho myiza.

Yavuze kandi ko bidakwiye ko abantu bumva ko akagari kazaba karushanwa n’akandi kugira umubare munini w’Abarinzi b’Igihango, kuko ngo biranashoboka ko muri ako kagari uyu mwaka ntawatorwa ariko wenda mu mwaka utaha akazahaboneka kuko ngo ni igikorwa kizaba buri mwaka, kandi ngo abatora ntibazarema Abarinzi b’Igihango, ahubwo ibikorwa ni byo bizabagena.

Mu mwaka ushize wa 2015, Abarinzi b’Igihango 17 mu gihugu bambitswe imidari kubera ibikorwa by’indashyikirwa bakoze.

Muri uyu mwaka ngo kwambika imidari Abarinzi b’Igihango bizakorwa mu cyumweru cy’Ubumwe n’Ubwiyunge kizaba hagati ya tariki ya 1 -7 Ukwakira 2016. Nibura ngo mu kwezi kwa Kanama 2016, Abarinzi b’Igihango ku rwego rw’akagari kigeza ku rw’akarere bagomba kuzaba bamaze kwemezwa, hasigaye abazemezwa ku rwego rw’igihugu.

Hari abashobora kudatandukanya Abarinzi b’Igihango n’Intwari, ariko Umuyobozi w’Umujyi wa Kigali Mukaruriza Monique avuga ko icy’ingenzi ari uko Abarinzi b’Igihango bazatoranywa, Komisiyo y’Igihugu y’Ubumwe n’Ubwiyunge n’Urwego rushinzwe Intwari, Imidari n’Impeta buri umwe akazamenya inshingano ze.

Kuri uyu munsi abo Komisiyo y’Igihugu y’Ubumwe n’Ubwiyunge yahuye na bo ni abayobozi bazagira uruhare mu kwemeza Abarinzi b’Igihango mu rwego rw’Umurenge, barimo abayobozi, abikorera n’abanyamadini, n’abahagarariye urubyiruko n’inzego z’abagore na bo bazajya gusobanurira abandi. Nyuma iyi Komisiyo izajya gusobanura iki gikorwa mu Ntara zindi zose.

HATANGIMANA Ange Eric
UM– USEKE.RW