Ibyaha bimunga umutungo w’igihugu: Haakurikiranywe asaga MILIYARI 11

*Mu kuzamura abaturage hanyerejwe miliyoni 687, arimo 264 za ‘Girinka’,
*Ubushinjacyaha ngo ntibwakurikirana Minisitiri Kaboneka busize Gitifu,
*Mu myaka 7, imanza Ubushinjacyaha butsinda ziyongereyeho 16%.

Ubushinjacyaha Bukuru uyu munsi bwamuritse ibyo bwagezeho mu mwaka w’Ubucamanza wa 2015-2016, bugaragaza ko mu byaha bimunga umutungo w’igihugu haakurikiranywe amafaranga n’imitungo bifite agaciro k’amafaranga y’u Rwanda asaga miliyari 11, ubu amaze kwemezwa n’inkiko ni miliyari 4. Imanza zose ngo bwazitsinze ku kigero cya 92.71%.

Muri uyu mwaka w’Ubucamanza wa 2015-2016, Ubushinjacyaha Bukuru bw’u Rwanda buvuga ko bwajyanye mu nkiko amadosiye 15 944, butsindamo 14 643 angana na 92.7%.

Ku byaha bimunga umutungo w’igihugu Ubushinjacyaha ngo bwabishyizemo ingufu, kuko ngo amadosiye bwakurikiranye ari 535, aregwamo abantu 867, bakurikiranyweho amafaranga cyangwa imitungo bifite agaciro ka 11 518 355 249 Frw.

Mu madosiye 327 yakurikiranywemo abantu 503 bwaregeye inkiko, abahamijwe ibyaha ni 398 banyereje/bangije amafaranga cyangwa imitungo ya Leta by’agaciro ka 4 141 076 956 Frw (ayemejwe n’inkiko ko yanyerejwe/yangijwe), banacibwa ihazabu ya 3 262 214 482 Frw.

Muri ibi byaha byagiye bishyirwa mu byiciro, hagaragaramo ibyaha byo kunyereza amafaranga yo kuzamura imibereho y’abaturage aho muri gahunda ya ‘Girinka Munyarwanda’ hinjiye amadosiye 15.

Muri iyi gahunda ikurikiranywemo amafaranga menshi mu zagenewe kuzamura rubanda, abantu 22 (umwe arafunze) nibo bashykirijwe inkiko, bakurikirikiranyweho kunyareza 264 470 000 Frw

Muri gahunda yo kuzamura abatishoboye ya VUP hakurikiranywe abantu 54 baregwa kunyereza 218 508 396 Frw.

Kurigisa umutungo wa Leta na byo biri mu byaha bimunga umutungo w’igihugu, Ubushinjacyaha Bukuru bugaragaza ko muri uyu mwaka wa 2015-2016 harigishijwe 1 152 129 932 Frw na 6 200 USD, arimo 775 402 712 Frw yanyerejwe mu misoro na 376 727 220 Frw kongeraho 6 200 USD yari aya Leta.

Ngo Ubushinjacyaha ntibwakurikirana Min. Kaboneka busize Gitifu…

Inzego zishinzwe gukurikirana abanyereza n’abakoresha nabi ibya Leta zakunze gutungwa agatoki kudakurikirana abayobozi bo hejuru cyangwa abantu baba bakekwaho kunyereza amafaranga yo mu mishinga migari (abo bamwe bita ibifi binini).

Umugenzuzi Mukuru mu bushinjacyaha, Jules Marius Ntete avuga ko impamvu hakurikiranwa abayobozi bo mu nzego z’ibanze ari uko ari bo bafite aho bahurira n’amafaranga mu buryo butaziguye.

Ati “ Burya ba Minisitiri na ba meya ntaho bahurira n’amafaranga, hari ba Gitifu, muri za VUP, Fertilizers (inyongeramusaruro), Girinka aho umuntu aziturira uwamushyize kuri list, byose bikorwa na ba Gitifu, ibi bintu biba byabereye aho hasi, bazajya babikora dukurikirane Minisitiri Kaboneka?”

Yunganira Ntete Jules, Umushinjacyaha Mukuru, Richard Muhumuza yavuze ko inzego zikunze kubaza iki kibazo nk’Inteko Ishinga Amategeko (Abadepite) n’Itangazamakuru zajya zibatungira agatoki aba bantu bavugwaho gukingirwa ikibaba.

Ati “Batubwire bati kanaka w’igifi kinini tuzi ko yakoze ibi mwanze kumukurikirana, nimumbwire kanaka munshinje ko nanze kumukurikirana, niba anahari nzababwira nti dosiye ye iteye itya.”

Mu mwaka wa 2015-2016, amadosiye yose Ubushinjacyaha bwajyanye mu nkiko ni 15 994 aho bwatsinzemo 14 643 muri 15 795 bwasomewe, ni ukuvuga ko bwatsinze ku kigero cya 92.71% mu gihe mu mwaka wa 2009 bwari bwatsinze kuri 76.60% (ikinyuranyo cya 16% muri iyi myaka 7).

Amafoto © M. Niyonkuru/Umuseke

Martin NIYONKURU
UM– USEKE.RW