IBITAVUZWE: Uko Team Rwanda yasubiye hamwe. Adrien Niyonshuti nk’umuhuza

Buri munyarwanda ukunda siporo n’umukino wo gusiganwa ku magare by’umwihariko yashimishijwe n’inkuru y’uko ikipe y’igihugu yongeye gusubirana. Kuva ku cyumweru nijoro kugera kuwa mbere nijoro, kari akazi gakomeye cyane ku bayobozi b’ishyirahamwe ry’umukino w’amagare na Minisiteri y’imikino kugarura abakinnyi bari bavuye mu mwiherero. Igitutu cyari kinini kiva ahatandukanye, cyane mu bakunzi ba Siporo mu Rwanda bagaragazaga ko ibyo aba bakinnyi basaba babikwiye ndetse kurenzaho. Byarangiye babigezeho, Adrien Niyonshuti yabigizemo uruhare rukomeye.

Mu mpera z’icyumweru gishize aba bakinnyi bavuye mu mwiherero i Musanze aho biteguriraga kubera ko ibyo basabaga bari bamaze kubwirwa ko batazabihabwa, Ishyirahamwe ry’umukino wo gusiganwa ku magare (FERWACY) ryabashinje kwivumbura no kugumuka.

Amakuru Umuseke ufite aremeza ko ku mugoroba wo ku cyumweru umunyamabanga uhoraho muri Minisiteri y’umuco na Siporo (MINISPOC) Eduard Kalisa yagiye i Musanze kugerageza kubonana n’aba bakinnyi; ngo yabasabye ko bahurira aho bakoreraga umwiherero, bo baramuhakanira bamubwira ko bahurira ahandi mu Mujyi wa Musanze kuko bavuye mu mwiherero birukanywe.

Kubonana byarananiranye igitutu ku bayobozi gitangira ubwo kuko bagombaga gukora ibishoboka byose bakagarura aba bakinnyi hamwe.

Kuwa mbere, igitutu cyabaye kinini kurushaho, kuko ibyo aba bakinnyi batanzweho bategurwa, uburyo basanzwe bakunzwe kubera umusaruro baha igihugu n’ibindi ntibyari kugwa mu mazi aka kanya kubera ibyo basabaga birimo n’ibyumvikana cyane nk’ubwishingizi bw’ubuzima.

Amakuru agera k’Umuseke avuga ko aba bakinnyi nyuma yo kuva mu mwiherero bacumbitse ahantu hamwe, maze bakomeza guhamagarwa kuri Telefone zabo zigendanwa umwe kuri umwe n’abayobozi banyuranye, ariko ntihagira icyo bageraho kuva mu gitondo cyo kuwa mbere kugera ku gicamunsi.

Byageze aho, Ndayisenga Valens, Hadi Janvier, Ruhumuriza Abraham n’abandi bagenzi babo 10 babakurikiye ntibongera kwitaba Telefone zabo zigendanwa mu gihe batari kwemererwa ibyo basabye nk’uko amakuru agera k’Umuseke abyemeza.

Adrien NIYONSHUTI yarahagobotse

Amakuru Umuseke ufite aremeza ko bigeze aho abakinnyi batitaba byabaye ngombwa ko abayobozi baca kubo mu miryango y’aba bakinnyi ngo babafashe kubumvisha ko bagomba nibura kwemera kuganira n’ubuyobozi bwabo.

Bamwe muri aba bakinnyi ku cyumweru nijoro bari babwiye Umuseke ko bafite agahinda kanini ku buryo bumva umwuga wabo bawuzinutswe. Ariko byari iby’agahinda, hari hakiri amahirwe yo kumva.

Muri kuriya guhamagarwa n’abayobozi, byageze aho abagera kuri batandatu muri aba bakinnyi bemeye gusubira mu mwiherero ku mugoroba wo kuwa mbere.

Nyuma yo kugerageza uko bashoboye, amakuru aremeza ko abayobozi muri FERWACY na MINISPOC biyambaje Adrien Niyonshuti, umukinnyi wa mbere w’amagare w’umunyarwanda wabigize umwuga ukina muri Afurika y’Epfo, ngo abafashe kumvisha aba bakinnyi ko bakwiye kuganira.  Bwari bumaze kwira kuri uyu wa mbere tariki 09 Ugushyingo 2015.

Niyonshuti, abakinnyi ba Team Rwanda, abato n’abakuru, bose bamwibonamo nk’umuntu ubarusha inararibonye mu gusiganwa ku magare. Uyu yarahamagaye kuva aho ari muri Afurika y’Epfo we baramwitaba, baraganira abagira inama.

Mu byo yabasabye, bakamwemerera, harimo kwemera gusanga abayobozi bagahurira i Musanze bakaganira. Byarashobotse, ibiganiro bibera i Musanze nijoro cyane, birangira bumvikanye abakinnyi basubira mu myitozo.

Ishyirahamwe ryo gusiganwa ku magare ryatangaje kuri uyu wa mbere ko aba bakinnyi basabye imbabazi ku myitwarire mibi bagize bivumbura, hanyuma bavanirwaho ibihano bari bahawe. Ko bemeranyijwe ko ibindi bibazo byose byabaho byakemukira mu biganiro.

Amakuru agera k’Umuseke aremeza ko aba bakinnyi bemerewe bimwe mu byo basabaga cyane cyane ubwishingizi bw’ubuzima mu gihe cy’imyotozo kuko bagiraga ubwo mu marushanwa gusa, bemerewe kandi kongererwa ibihembo mu irushanwa rya ‘Tour du Rwanda’, ndetse no kuzamura ibihembo by’uwegukanye ‘etape’ muri Tour du Rwanda mu rwego rwo kubibashishikariza.

Mu ijoro ryakeye nyuma y’ibiganiro abakinnyi bari basigaye basubiye aho bitoreza basanga abandi. Ibyishimo ngo byari byose gusubirana kuri bo.

Ubuyobozi bw’ishyirahamwe ry’umukino w’amagare bwatangaje ko ubu umwuka ari mwiza mu bakinnyi, kandi bakomeje kwitegura neza irushanwa rya Tour du Rwanda rizatangira ku cyumweru tariki 15 Ugushyingo.

Kuri uyu wa kabiri, abakinnyi nabo batangaje ko ubu umutima wabo bawusubije ku mwuga wabo kandi bagomba kwitwara neza bishoboka muri Tour du Rwanda.

UM– USEKE.RW