Huye- EDPRS II izaha abarenga ibihumbi bibiri akazi- Mayor Kayiranga

Mu muhango wo gutangiza  ku mugaragaro  imurikagurisha  ryateguwe  n’Ikigo kigisha imyuga n’ubumenyingiro mu Ntara y’Amajyepfo (I P R C)  wabaye ejo, Umuyobozi w’Akarere ka Huye, Kayiranga Muzuka Eugène  yavuze ko  muri gahunda y’ igihugu y’imbaturabukungu  ya kabiri (I D P R S)  bateganya  guha  urubyiruko rugera ku bihumbi  bibiri   akazi rwo mu Karere ayoboye.

Muri iri murikagurisha ryabereye mu karere ka Huye,  kuri uyu  wa gatandatu taliki ya 23/Kanama/2014, ibigo  bifite mu nshingano zabyo kwigisha imyuga n’ubumenyingiro mu ntara y’Amajyepfo  byamuritse   ibikoresho  byifashisha  kugira ngo abanyeshuri basobanukirwe n’amasomo yabo.

Mayor Kayiranga wari umushitsi mukuru muri uyu muhango yavuze ko mu nkingi  enye zigize  EDPRS II harimo  no gushakira urubyiruko  rurangiza amashuri y’imyuga imirimo mu rwego rwo kugira ngo  umubare  w’abadafite akazi ugende ugabanuka.

Yagize ati: ʺ Twifuza ko  urubyiruko rwitabira kwiga amashuri y’imyuga kubera ko iyo  rurangije rubona akazi mu buryo bwihuse’’

Dr Twabagira Barnabé Umuyobozi  wa IPRC  mu  ntara y’Amajyepfo  yavuze ko  iri murikagurisha  ngarukamwaka rigamije kwerekana  aho  amashuri yigisha  imyuga ageze atanga imirimo ku bantu benshi cyane cyane ku rubyiruko by’umwihariko n’abandi bantu muri rusange  bize  ibijyanye n’imyuga,  akavuga ko  abarangiza muri aya mashuri  badategereza igihe kinini  bashaka akazi.

Mu nkingi enye  za EDPRS II igenderaho  harimo  ubukungu bushingiye  ku guteza imbere  umurimo,  iterambere ry’icyaro, Imiyoborere myiza,  guteza imbere  urubyiruko  no guhanga imirimo,.

Ni ku nshuro ya kabiri iri murikagurisha  mu bigo byigisha imyuga n’ubumenyingiro  mu ntara y’amajyepfo ribaye.  Mu cyumweru kirenga rizamara rikaba rizatwara  miliyoni  30 zirenga z’amafaranga y’u Rwanda.

Amashuri  87  niyo yigisha  imyuga  n’ubumenyingiro  muri iyi ntara.  Buri mwaka abarangiza  muri aya mnashuri  barenga  ibihumbi bine.

MUHIZI ELISEE

UM– USEKE.RW/Huye.