Hadi Janvier yegukanye Race for Culture ku nshuro ya kabiri
Hadi Janvier yaje imbere mu nshuro zose bazengurutse umugi wa Nyanza slide
*Mu bakobwa isiganwa ryasojwe na Munyarwandakazi urimo, ryegukanwa na Dawit Mengis Yohana wo muri Eritrea
Hadi Janvier ukinira Bike Aid yo mu Budage yongeye kwegukana isiganwa ry’amagare ryitiriwe umuco ryahagurutse i Nyamagabe risorezwa i Nyanza, ku ntera ya Km 119,6.
Tariki 11 Nyakanga 2015, nibwo Hadi Janvier yaherukaga gutsinda isiganwa muri Rwanda Cycling Cup. Nabwo ni Race for Culture yatwaye assize Nsengimana Jean Bosco wabaye uwa kabiri.
No kuri uyu wa gatandatu Hadi Janvier uri mu biruhuko mu Rwanda ni we wahabwaga amahirwe mbere y’iri siganwa, kuko benshi mu bakinnyi bazwi mu mukino w’amagare mu Rwanda batagombaga gukina.
Abo bakinnyi ni: Joseph Areruya, Jean Claude Uwizeye na Samuel Mugisha, (bari muri Team Rwanda iri mu masiganwa mu Bwongereza), Patrick Byukusenge na Hakuzimana Camera bari mu bihano, naho Eric Manizabayo bita Karadiyo we yakoze impanuka, avunika urutugu.
Isiganwa rigitangira mu mujyi wa Nyamagabe Hadi Janvier yavuye mu gikundi agerageza gutangira gusiga abandi.
Gusa bataragera i Huye baje kumufata, Ruberwa Jean w’ikipe ya Benediction ajya imbere, atanga abandi kuri gare ya Huye byamuhesheje igihembo cya Frw 50 000 yatanzwe na Horizon Express.
Nyuma y’iki gihembo, Hadi yongeye kuva mu gikundi, atanga bagenzi be ahazwi nka ISAR Isonga ahembwa Frw 50 000, abasize umunota n’amasegonda 30.
Mu Karere ka Nyanza, abakinnyi bagombaga kuhazenguruka inshuro 14, buri imwe ifite intera ya Km 5,2 harimo n’imihanda y’amabuye.
Izi nshuro zose Hadi yazizengurutse ari imbere, byatumye yegukana iri siganwa, akoresheje 3h26’17”, akurikirwa na Gasore Hategeka wa Benediction Club.
Muri iri isiganwa hakinnye n’abakobwa barimo abanya Ethiopia na Eritrea 11 bari kwitoreza mu kigo cy’i Musanze. Mu bakobwa isiganwa ryegukanwe na Dawit Mengis Yohana wo muri Eritrea akoresheje 2h24’13” kuri Km 88,4.
Mu bakobwa 24 batangiye isiganwa, hasoje umunani batarimo Umunyarwandakazi n’umwe, kuko mu kuzenguruka ‘Sircuit’ iyo uwa mbere akuzengurutseho, uhita uva mu isiganwa.
Tariki ya 6 Kanama 2016 hazakinwa Northern Circuit bava i Rubavu bajya i Musanze, mu 2014 ryatwawe na Nsengimana Jean Bosco ukinira Bike Aid.
Abakinnyi 5 ba mbere
- Hadi Janvier – Bike Aid 3h26’17”
- Gasore Hategeka – Benediction 3h26’53”
- Biziyaremye Joseph – Cine Elmay 3h28’28”
- Ruhumuriza Abraham – CCA “”
- Twizerane Mathieu – CCA 3h28’23”
Batatu ba mbere mu ngimbi
- Rugamba Janvier – Les Amis Sportifs 2h32’33”
- Munyaneza Didier – Les Amis Sportifs 2h32’36”
- Ngabonziza Yves – Benediction 2h32’42”.
Roben NGABO
UM– USEKE.RW
English