Hadi Janvier yagarukanye umudari wa zahabu, ishema n’ibyishimo

Niwo mudari wa mbere wa zahabu u Rwanda rwegukanye muri aya marushanwa ya All Africa Games, ari kumwe na bagenzi be, Hadi Janvier yaje awambaye mu gituza  agera ku kibuga cy’indege cya Kanombe aho yakiriwe n’abantu batari bacye ku mugoroba wo kuri uyu wa kabiri. Yavuze ko gutwara uyu mudari yabiteguriwe ariko bigeze mu irushanwa haba icyo yise nk’ibitangaza.

Hadi Janvier yegukanye uyu mudari ku cyumweru asize abandi 49 basiganwaga magare kuri 150Km.

Hadi yazanye na bagenzi be umunani bari kumwe muri Team Rwanda i Brazzaville.

Yagize ati “Umudari wa zahabu natsindiye nibo nywukesha. Team Rwanda ni intagereranywa. Bamfashije muri byose kugeza negukanye umudari mu irushanwa ryari ririmo abanya-Eritrea n’abanya-Algerie n’abanya-Africa y’epfo twari tuzi ko baturusha, ariko ku bw’ubufatanye nka Equipe turabikoze. Ni ishema ku miryango yacu, ni ishema kuri FERWACY, ni ishema ku Rwanda rwose….”

Ikipe y’abasiganwa ku magare kandi yatahanye umudari wa Bronze begukanye mu gusiganwa n’igihe nk’amakipe (Team Time Trial).

Aimable Bayingana umuyobozi w’ishyirahamwe ryo gusiganwa ku magare yatangaje ko ari ibyishimo kuri bo kandi uyu mudari ari umusaruro w’imyiteguro ikomeye aba basore bamazemo iminsi kandi bazakomeza ndetse bagategura abazabasimbura.

Yasoje agira ati “reka nongere mbashimire, by’umwihariko kapiteni wabo Hadi Janvier ari nawe wahesheje ishema abanyarwanda twese.”

UM– USEKE.RW