Gicumbi: Guverineri Musabyimana yategetse gufunga utubari tudafite ubwiherero

Umuyobozi w’Intara y’Amajyaruguru, Musabyimana Jean Claude kuri uyu wa Gatandatu yifatanyije n’abaturage bo mu murenge wa Nyamiyaga mu karere ka Gicumbi mu gikorwa cy’umuganda ngarukakwezi, abasaba guhagurukira isuku nke igaragara muri aka gace, ategeka abayobozi bo hasi gufunga utubari tudafite ubwiherero kuko twangiza ubuzima bw’abaturage.

Muri uyu muganda wabereye mu murenge wa Nyamiyaga , wanitabiriwe na Depite Gatabazi Jean Mari Vianney na we wagarutse ku mwanda uvugwa muri aka gace by’umwihariko anenga abagabo bafite ingo zitagira ubwiherero.

Umuyobozi w’Intara y’Amajyaruguru, Musabyimana Jean Claude watanze ikiganiro kirambuye, yasabye abaturage baje muri iki gikorwa ko bakwiye kwiyambura icyasha cy’isuku nke yakunze kuvugwa muri aka gace.

Ati “Intara yacu y’Amajyaruguru twagiye tunengwa kugira umwanda kuva kera kandi namwe mwarabyumvise, ndagira ngo mumfashe Ttubyange ku buryo bitazakomeza kutuvugwaho, dufatanye isuku tuyigire umuco.”

Uyu muyobozi w’Intara y’Amajyaruguru yanagarutsecyane  ku tubari tudafite uwiherero ku buryo abatunyweramo batabona aho bikinga bigateza umwanda mu dusanteri.

Guverineri Musabyimana yasabye ba nyiri utu tubari guhita bacukura imisarani, asaba abayobozi bo hasi ko abadahita bubahiriza aya mabwiriza bafungirwa kuko bakomeje kwangiza ubuzima bw’abaturage.

Ati “Kirazira gufungura akabari katagira amusarani  hafi aho ndetse n’aho abantu bihagarika, kirazira Kikaziririzwa,  abayobozi b’Utugari mbahaye uburenganzira mudufunge kuko nimutahafunga ni mwe tuzabibaza.”

Depite Gatabazi Jean Mari Vianney  yagarutse kuri iki kibazo, anenga abagabo bafite ingo zitagira ubwiherero.

Iyi ntumwa ya rubanda yavuze ko nta muntu utekereza ko agomba kurya yirengagije ko nyuma yo kurya akenera kujya mu bwiherero.Ati “Umugabo ufite urugo rutagira umusarani nta mugabo umurimo.”

Abaturage bo mu murenge wa Nyamiyaga bizeje ubuyobozi ko bagiye kwikubita agashyi nyuma y’impanuro bahawe.

Bavuga ko bazajya bafatanya, aho bigaragara ko umuturage adafite ubushobozi bwo kwiyubakira ubwiherero bazajya bamutera inkunga yo bamwubakire.

Uyu murenge wa Nyamiyaga wakorewemo Umuganda ku rwego rw’Intara wabaye uwa mbere mu karere ka Gicumbi mu gukora neza iki gikorwa cy’umuganda, ukaba washyikirijwe ishimwe nyuma yo kubaha izi mpanuro.

Evence NGIRABATWARE
UM– USEKE.RW/GICUMBI