E. IMENA wari Minisitiri ahakanye ibyo aregwa, ngo narekurwe ajye kurera uruhinja rwe

* Ngo yahaye isoko kompanyi y’abagore b’abakozi bakorana
* We na bagenzi be barashinjwa itonesha n’icyenewabo
* Evode Imena yahakanye ibyo aregwa avuga ko ibyo yakoze byemewe n’amategeko
* Yasabye ko bamurekura akajya kwirerera uruhinja

Evode Imena wahoze ari umunyamabanga wa Leta ushinzwe ibya mines, hamwe n’abagabo babiri bakoranaga nawe Kayumba Francis na Kagabo Joseph bitabye Urukiko rw’ibanze rwa Nyarugenge ruri i Nyamirambo muri iki gitondo.

Bose bari bunganiwe, Imena yari afite abunganizi babiri.

Ubushinjacyaha bwatangiye busobanura ibyaha biregwa aba bagabo batatu bose bari abakozi ba MINIRENA.

Bakurikiranyweho icyaha cy’itonesha n’icyenewabo, guha inyandiko utayikwiye, n’inyandiko mpimbano.

Ubushinjacyaha buvuga ko Kagabo Joseph yahawe ubutumwa bwo kujya gushaka ahazakorerwa ubucukuzi bw’amabuye y’agaciro.

Ngo ageze i Nduba abona ahakwiye gukorerwa ubushakashatsi ku icukurwa cy’amabuye y’agaciro maze aho kubimenyesha urwego rwabimutumye yibira ibanga umugore we n’uwa mugenzi we Kayumba ngo bashinge kompanyi (company) babivanemo amafaranga.

Ubushinjacyaha buvuga ko Kagabo, umugore we n’umumugore wa mugenzi we (Kayumba) bashinze kompanyi yitwa JDJ,ubushinjacyaha buvuga ko ari impine z’amazina y’aba bagore hamwe na Kagabo (Joviah, Dianna, Joseph) ari nabo bagize iyi Kompanyi babigiriwemo inama na Kagabo.

Iyi kompanyi ngo yaje kwemerwa n’uwahoze ari Umunyamabanga wa Leta wari ushinzwe iby’ubucukuzi bw’amabuye y’agaciro, Evode Imena. Asinya ko ihabwa isoko.

Umushinjacyaha yemeza ko ibi byakoranywe umugambi w’itonesha n’ikenewabo abizi neza ko ari iya bariya bantu.

Ati “Kagabo agiye mu butumwa, ibivuyemo aho kubishyikiriza inzego zamutumye ahubwo abibwira umugore we n’umugore wa mugenzi we, dosiye arayiherekeza ayishyira Minisitiri abizi ko ibi bisabwa n’umugore we.”

Umushinjacyaha yemeza kandi ko Minisitiri Evode IMENA yandikiye n’umuyobozi w’ikigo gishinzwe umutungo kamere amubwira ko iyi kompanyi bayihaye isoko binyuranyije n’amategeko ariko Evode IMENA ntagire icyoabikoraho.

Iyi kampani ya JDJ ngo yaje guhererekanya ububasha n’indi yitwa KNM bayigura ibihumbi 20 by’amadolari.

Ubushinjacyaha buvuga ko mu bugenzacyaha Evode Imena yemeye aya makosa akurikiranyweho ndetse ko yatanze uruhusa kuri JDJ abizi neza ko ari kompanyi y’abo bakorana.

Imena yahakanye ibyo aregwa

Evode Imena mu kwisobanura yabiteye utwatsi avuga ko aba bakozi babiri bakurikiranywe hamwe atari n’abakozi ba MINIRENA ahubwo ko ari ab’ikigo cy’umutungo kamere.

Imena ati  “Minirena ifite abakozi 40 ikigo cy’umutungo kamere gifite abakozi barenga 400, ntabwo nari kumenya abagore b’abakozi bose. ”

Evode Imena uhakana icyaha cy’itonesha avuga ko iyi kampani ya JDJ yaje gusaba uruhusa ndetse bikanyuzwa mu nzira zikwiye nawe byamugeraho akayemerera uruhusa.

Ati “wasabye, nasuzuma ngasanga ibisabwa n’itegeko urabyujuje nakwimira iki? ”

Asabye ko yarekurwa akajya kurera uruhinja rwe.

Evode IMENA yahakanye cyane ibyo akurikiranyweho, asaba urukiko kumugira umwere akarekurwa agataha kandi ko adashobora gutoroka ubutabera.

Ati ” ntabwo nshobora kwihisha ubutabera, kuri CID bampamagara ni jye wijyanye hari  saa kumi n’ebyiri, ubwa kabiri hari saa sita z’ijoro ni jye wijyanye. Mfite aho ntuye hazwi, mfite umugore, mfite uruhinja rw’ukwezi n’igice mwanyemerera nkajya kururera. ”

Kagabo ngo ntiyamenye ko umugore we na mugenzi we bashinze kompanyi

Kagabo Francis wahawe ubutumwa bwo kujya kugenzura ahakorerwa ubucukuzi na we yahakanye ibyo akekwaho, avuga ko nta bubasha yari afite bwo kwihesha umutungo ndetse ko atigeze amenya ko umugore we n’uwamugenzi we bashinze iyi kompanyi ivugwa ko yahawe uruhushya itoneshejwe.

Ahakana ko iyi kompanyi ya JDJ atigeze ayibera umunyamuryango nk’uko byavuzwe n’ubushinjacyaha. Ati “JDJ yagiye kwiyandikisha muri RDB nta na hamwe ngaragara nk’umunyamuryango wayo. ”

Kagabo avuga ko yakoze neza akazi yari yahawe ndetse ko yaje agatanga raporo yako ikemerwa n’abakuriye. Ati ” Nk’umuntu wari umukozi muto nta na hamwe nari mpuriye n’itangwa ry’ibyangombwa.”

Nawe yasabye ko yarekurwa akajya kwita ku muryango we, akavuga ko adashobora gutoroka ubutabera kuko ari we wijyanaga igihe cyose yahamagajwe ndetse ko afite aho aba kandi hazwi.

Kuri Evode Imena kandi washinjwe urwango, Ubushinjacyaha bumushinja kwima uruhushya rwo gucukura amabuye y’agaciro uwitwa Ndamage Straton wari ufite kompanyi yitwa Nyaruguru Agromining akarwemerera kompanyi yari itarashingwa.

Evode yahakanye uru rwango avuga ko iyi kompanyi atari we wayimye uruhushya ahubwo ko byakozwe na Stanislas Kamanzi wari Minisitiri wa MINIRENA.

Ati ” iriya yahakaniwe byakozwe n’umuyobozi unkiriye. ”

Kayumba Francois ukurikiranyweho kuba umwe mu bari bagize akanama kemeje itangwa ry’icyangombwa kuri kompanyi ivugwaho gutoneshwa akaba ari n’umugabo w’umwe mu bari bashinze iyi kompanyi, nawe  yahakanye ibyo aregwa avuga ko iki cyangombwa kitatanzwe na Kayumba ku giti cye. Ati “nari nsanzwe ndi member wa komite ntabwo nagiyemo kugira ngo ntange uruhushya.”

Avuga ko nta cyaha akwiye gukurikiranwaho ahubwo ko yarekurwa akajya kwita ku muryango we cyane ko n’umugore we ngo yagize ikibazo cy’ubuzima kubera ifungwa ry’umugabo we. Avuga ko umugore we yagize ikibazo cya stroke (iturika ry’udutsi two mu bwonko).

Abanyamategeko barashinja Ubushinjacyaha kugira abagore ibikoresho by’abagabo

Umwe mu bunganira Kayumba na Kagabo yavuze ko ibyakozwe byose byanyuze mu nzira ziteganywa n’amatageko.  Akavuga ko ko nta n’ikibazo cyavuka mu gihe abagore b’aba bagabo bakirikije ibisabwa bagatsindira isoko.

Ati “umugore afite uburenganzira bwo gukora icyo ashaka atabanje kubinyuza ku mugabo we. Tugiye muri ibyi twavuga ngo mu Rwanda nta mugore uzongera gufungura kampanyi umugabo we atabyemeye.”

Nyuma yo kumva impande zombi, iburanisha ryahumuje Urukiko ngo ruzatanga umwanzuro warwo ku ifungwa n’ifungurwa ry’agateganyo kuwa Gatanu mu gitondo.

Martin NIYONKURU
UM– USEKE.RW