Dukeneye ibitaramo byinshi bikomeye bitari iby’amarushanwa gusa- Uncle Austin

Toshi Luwano Austin, umuhanzi akaba n’umunyamakuru wamenyekanye cyane ku izina rya Uncle Austin, asanga mu Rwanda hari hakwiye kujya habera ibitaramo byinshi byitabirwa n’abantu benshi bitari iby’amarushanwa gusa.

Ibi abitangeje nyuma yo kwitabira igitaramo cya Knowless aherutse gukorera mu Ruhango akab yari umwe mu bahanzi bagombaga gutaramira abakitabiriye.

Kubera ubwinshi bw’abantu yaririmbiye n’uburyo bari bamukunze, byatumye avuga ko bikwiye ko ibitaramo byakongerwa bitarimo imyiryane kubera gushaka kwegukana ibikombe. Ahubwo akaba ari ibitaramo abafana bahuriramo n’abahanzi bakunda.

Mu kiganiro yagiranye n’itangazamakuru nyuma y’icyo gitaramo, Uncle Austin yatangaje ko muri gahunda arimo guteganya gukora vuba, agiye no gushaka uburyo yategura igitaramo cyo mu Ntara kubera ko Knowless yamubereye urugero rwiza.

Mu mpera za 2015 Knowless na Austin bigeze guterana amagambo bapfa kuba hari indirimbo bagombaga kumvikanamo bose ariko biza kurangira Uncle Austin ijwi rye risibwe ahubwo hagumamo irya Knowless na Roberto umunyaZambiya.

Muri icyo gitaramo cyabereye mu Ruhango, Austin akaba nabyo yarabivuzeho gusa avuga ko nta kibazo afitanye na Knowless ndetse na Kina Music muri rusange.

Uretse kuba Uncle Austin ari afatwa nk’umuhanzi, ni umwe mu bantu batangiye igikorwa cyo guteza imbere muzika nyarwanda nk’umunyamakuru.

Imwe mu mbogamizi benshi bavugaga ko ariyo yadindizaga umuziki w’u Rwanda ahubwo hakamenyekanishwa indirimbo z’inyamahanga.

Ni n’umwe mu bahanzi ufite ibyo benshi bamwigiraho kubera ubunararibonye. Mu minsi ishize nibwo yakoranye indirimbo bise ‘Urwo nkukunda’ n’umuhanzi muto urimo kuzamuka witwa Yvan Buravani.

Iyo ndirimbo ikaba ari imwe mu ndirimbo zimaze igihe zikunzwe kandi yanatumye Buravani arushaho kumenyakana nubwo amaze kugira umubare w’abafana be bakunze ibihangano bye.

https://www.youtube.com/watch?v=m4mS4ips3cQ

Joel Rutaganda

UM– USEKE.RW