De Gaulle agarutse mu rukiko…Uyu munsi atashye ataburanye

*Ubushinjacyaha bwajuririye icyemezo cyo kuba yaragizwe umwere,
*Abaregwanwa nawe bari bahanishijwe amezi 6 bari kujurira ngo bahanagurweho icyaha

Mu gitondo cyo kuri uyu wa 10 Nyakana, Nzamwita Vincent De Gaulle uyobora ishyirahamwe ry’umupira w’amaguru mu Rwanda (FERWAFA) yazindukiye ku rukiko rwisumbuye rwa Nyarugenge kugira ngo aburane ku bujurire bw’Ubushinjacyaha buvuga ko yari akwiye guhamwa n’icyaha cyo gufata icyemezo gishingiye ku itonesha n’ikenewabo yari yagizweho umwere.

Mu mpera za Kamena 2016, urukiko rw’ibanze rwa Nyarugunga rwari rwagize umwere Nzamwita Vincent de Gaulle ku cyaha cyo gufata icyemezo gishingiye ku itonesha, icyenewabo n’ubucuti mu gutanga isoko ryo gukora inyigo yo kubaka Hotel ya FERWAFA.

Uru rukiko rwavugaga ko Ubushinjacyaha butabashije kugaragaza ibimenyetso simusiga bigaragaza ko uyu muyobozi wa FERWAFA yashyize umukono kuri kiriya cyemezo abizi neza ko cyakozwe hagendewe ku itonesha.

Umucamanza w’uru rukiko yahamije icyaha Murindahabi Olivier wari umunyamabanga mukuru w’iri shyirahamwe na Eng Adolphe Muhirwa wari watsindiye isoko ryo gusesengura kompanyi zapiganiwe isoko ryo kubaka iyi Hoteli, bombi bahanishwa gufungwa amezi atandatu.

Ubushinjacyaha bushaka ko na De Gaulle ahanwa… 

Aba bagabo batatu bose bazindukiye ku rukiko rwisumbuye rwa Nyarugenge ruri i Nyamirambo ngo baburane kuri ubu bujurire bwatanzwe n’Ubushinjacyaha n’abahamwe n’icyaha nabo bajuririra kuvanwaho ubusembwa.

Ubushinjacyaha bwajuririye icyemezo cyafashwe n’Umucamanza wo mu rukiko rw’ibanze rwa Nyarugunga kuri Nzamwita (wagizwe umwere), buvuga ko na we akwiye guhamwa n’iki cyaha kuko ari we wari ukuriye abandi bashyize umukono kuri iki cyemezo atagenzuye ko cyakoranywe uburiganya.

Murindahabi Olivier na Adolphe Muhirwa bahamijwe icyaha bakaza no kumara amezi atandatu muri gereza bo basaba kuvanwaho ubu busembwa bavuga ko ibyo bakoze byanyuze mu mucyo kuko byaciye mu nzira zemewe kandi ziteganywa n’amategeko.

Gusa batashye bataburanye kuko Umucamanza yababwiye ko Umushinjacyaha uri muri uru rubanza yamumenyesheje ko ataboneka mu masaaha y’igitondo (ni bwo rwagombaga kuba) kubera inshingano z’akazi.

Ngo yagombaga kuboneka ku isaaha ya saa munani (14h00).

Umucamanzwa wari umaze kubwirwa ko Umunyamategeko wunganira De Gaulle na Murindahabi na we  afite urundi rubanza mu masaha y’ikigoroba, yahise asubika iburanisha aryimurira tariki ya 07 Nzeri 2017.

Martin NIYONKURU
UM– USEKE.RW