Coke Studio yatumiye Bruce Melodie

Kuri iki cyumweru tariki ya 21 Gicurasi 2017 nibwo Bruce Melodie yahagurutse i Kigali yerekeza muri Kenya ku butumire bwa Coke Studio.

Niwe muhanzi wa mbere w’Umunyarwanda ugize amahirwe yo gutumirwa n’iyo nzu ikora umuziki iri ku rwego mpuzamahanga.

Byari bisanzwe bimenyerewe ko iyo nzu ikorana n’abahanzi b’ibikomerezwa mu karere no ku isi muri rusange kubera amazina yabo.

Ibyo bikaba binayifasha kumenyekanisha ibikorwa byayo mu buryo buyoroheye birimo ikinyobwa cya Coka Cola. Bruce Melodie nawe ubu akaba yashyizwe ku rutonde rw’abo bahanzi.

Coke Studio yagiye itumira abahanzi barimo Ne-Yo, Chris Brown, Trey Songz abo bose bakaba baheruka muri Kenya. Ikaba inafitanye amasezerano y’umwihariko na Jason Derulo, Jay Sean, Edward Maya, na Flo Rida.

Iyo nzu kandi yakoranye n’abahanzi bo mu karere barimo Jose Chameleon, Julianna Kanyomozi, Fally Ipupa, Diamond Platnumz, Ali Kiba, Sauti Sol n’abandi.

Mu minsi ishize iyo nzu ikaba yaranatumiye Ykee Benda wakoze ‘Munakampala’ binashoboka ko ariwe uzahuzwa na Bruce Melodie bakaririmbana.

Joel Rutaganda

UM– USEKE.RW