CECAFA: u Rwanda rutsinze Kenya kuri Penaliti rujya muri 1/2

Ku gicamunsi cyo kuri uyu wa kabiri, Ikipe y’Igihugu y’umupira w’amaguru ‘Amavubi’ isezereye Harambee Stars ya Kenya, iyitsinze Penaliti 5-3 nyuma yo gusoza umukino ntayibashije kureba mu izamu ry’indi. Hari mu mikino ya CECAFA muri 1/4 iri kubera muri Ethiopia.

Ni umukino wagoye cyane abakinnyi b’umutoza Johnny Mackinstry, kubera ubusatirizi bwa Kenya bwari buyobowe na rutahizamu wa Gormahia, Mike Olunga ndetse na bagenzi be Allan Wanga, na Jacob Keli.

Harambee Stars yabonye amahirwe menshi mu gice cya mbere, ariko ba myugariro b’u Rwanda, Rwatubyaye Abdul na Ndayishimiye Celestin bakomeza kwitwara neza. Umuzamu Jean Luc Ndayishimiye nawe akora akazi ke neza akuramo imipira itatu yari yabazwe mu gice cya mbere kirangira ari 0 – 0.

Umutoza McKinstry yaje gukora impinduka Yvan Senyange wa Gicumbi FC yinjiramo asimbuye Nshuti Dominique Savio, Haruna Niyonzima kapiteni wari wabanje hanze nawe arinjira asimbuye Yusuf Habimana. Mu gihe Mugiraneza Jean Baptiste yaje kuvunika, agasimburwa na Isaie Songa.

Muri rusange ni umukino utagaragayemo gusatirana cyane uretse mu gice cya mbere ndetse no mu minota 15 ya nyuma y’umukino Kenya yasatiriye cyane u Rwanda, ariko Amavubi nayo akanyuzamo agasatira. Warangiye ari ubusa ku busa.

Kuri za Penaliti, eshanu z’u Rwanda zatewe na Haruna Niyonzima, Jacques Tuyisenge, Djihad Bizimana, Songa Isaie na Celestin Ndayishimiye wateye iya nyuma bose bazinjiza neza.

Amahirwe ntabwo yasekeye Kenya, muri Penaliti bahusha iya gatatu yafashwe n’umunyezamu Jean Luc Ndayishimiye bita Bakame. Birangira Amavubi atsinze kuri Penaliti 5 kuri 3 za Kenya.

Jacques Tuyisenge wari kapiteni w’u Rwanda, mbere y’uko Haruna ajyamo, yatowe nk’umukinnyi w’umukino.

Abasore b’u Rwanda basa n’abihoreye kuri Kenya kuko mu mwaka wa 2013, ubwo CECAFA y’ibihugu yaberaga muri Kenya, Harambee Stars yasezereye Amavubi hano muri 1/4.

Amavubi yageze muri 1/4 nyuma yo kurangiza imikino yo mu itsinda A itsinze imikino ibiri, igatsindwa umwe. U Rwanda rwatsinze Somalia 3-0, rutsinda Ethiopia yakiriye amarushanwa 1-0, mu gihe bari batsinzwe na Tanzania 2-1.

Kuri uyu wa kane, Amavubi azahura na Sudani mu mukino wa 1/2; Mu gihe Uganda yo izaba ihura na Ethiopia yakiriye iri rushanwa.

Abakinnyi babanje mu kibuga ku ruhande rw’u Rwanda ni; Ndayishimiye Eric Bakame, Ombolenga Fitina, Ndayishimiye Celestin, Rwatubyaye Abdul, Usengimana Faustin, Bizimana Djihad, Mugiraneza Jean Baptiste (Migi), Mukunzi Yannick, Nshuti Dominique Savio, Habimana Youssuf, Jacques Tuyisenge.

UM– USEKE.RW