CAF yaranyuzwe, irashimira Paul Kagame ko yakoze ibyo yasezeranye kuri CHAN

Binyuze ku muyobozi wungirije w’impuzamashyirahamwe y’umupira w’amaguru muri Africa, Almany Kabele, CAF ngo yanyuzwe n’uko u Rwanda rwiteguye CHAN ndetse irashimira Perezida Kagame Paul uburyo Leta y’u Rwanda yiteguye neza kwakira igikombe cya Africa gihuza abakina imbere mu bihugu byabo, CHAN 2016. Abanarwanda bitabira imikino hamwe na hamwe nabo bavuga ko iyi mikino yateguwe neza koko ariko hari bimwe na bimwe bitanoze birimo nko kwakira abafana ku bibuga.

Perezida Paul Kagame n’umuryango we bari mu bihumbi bisaga 26 byari kuri stade Amahoro kuri uyu wa gatandatu, ahatangijwe ku mugaragaro imikino ya CHAN 2016. Nyuma yo kuvuga ijambo ry’ikaze, Kagame yashyigikiye Amavubi, abasha gutsinda Cote d’ivoire mu mukino wo gufungura igitego 1-0.

Mu kwinjira kuri uyu mukino ariko amasaha nk’abiri mbere yawo byari akaga kuri benshi cyane, umubyigano ku babashije kwinjira mu bice by’abaciriritse bya Stade, ndetse na benshi batabashije kwinjira kuko stade yaje kuzura cyane kandi abafite amatike hanze bakiri benshi.

Ibi ni nako byagenze kuri stade Huye mikino yo ku cyumweru cyane uwa Congo Kinshasa na Ethiopia.

Bamwe mu bafana baganiriye n’Umuseke bavuga ko imyiteguro ku ruhande rw’ibyangombwa nkenerwa koko yagenze neza ku kigero gishimishije ariko ku bijyanye no kwakira abafana ku bibuga no gucuruza amatike hagaragayemo amakosa akomeye.

Mu mwaka wa 2011, nibwo byatangajwe k’umugaragaro ko CHAN 2016 izabera mu Rwanda, byari nko kurushimira uko rwari ruherutse kwakira neza ibikombe bya Africa bya U17 na U20.

U Rwanda rumaze imyaka ine rwitegura iri rushanwa, hasanwe amastade, ibibuga by’imyitozo birubakwa, hubatswe n’amaHotel mu rwego rwo kwitegura ibi birori bya ruhago, CAF kandi ivuga ko ishimishwa n’uburyo abanyarwanda bitabira cyane iyi mikino kugeza ubu, ngo bitandukanye no mu bindi bihugu.

Ibi nibyo CAF yashingiyeho ishimira perezida Kagame kubera imyiteguro myiza u Rwanda rwakoze.

Umuyobozi wungirije wa CAF, Almany Kabele yagize ati “twe nka CAF, twanyuze n’imyiteguro u Rwanda rwakoze mbere yo kwakira CHAN. Twasanze ibibuga n’amaHotel byaruzuye, ndetse rwose byari biri ku rwego rurenze uko twabikekaga. Mu mpande zose z’u Rwanda, uhasanga ‘fibre optic’ (ya internet yihuta), ibintu byose twasanze bimeze neza. CAF yaranyuzwe, twasanze buri kimwe kiri mu mwanya wa cyo. Icyo navuga, nuko dushima Kagame Paul wubahirije ibyo yadusezeranyije.”

Kabele yakomeje avuga ko yishimira iterambere rya CHAN, irushanwa ryatangiye mu 2009, rifite intego yo kumenyekanisha abakinnyi bakina imbere muri Africa mu bihugu iwabo.

Almany Kabele yakomeje agira ati “Turi kugera ku ntego yacu, abakinnyi bakina imbere muri Africa bari kumenyekana. Kandi bituma urwego rwa ruhago ya Africa ruzamuka kuko abakinnyi bakina amarushanwa menshi akomeye. Ikindi twishimira, ni uko twatangiranye amakipe umunani (8), ariko ubu tukaba tugeze ku makipe 16 yitabira CHAN. Irushanwa ryarakuze, kandi abanyaRwanda barimo kubigaragaza.”

CHAN 2016 ifite amatsinda ane. Irimo kubera mu migi itatu, Kigali, Huye na Rubavu. Yatangiye tariki 16 Mutarama, izasozwa tariki 7 Gashyantare 2016.

Roben NGABO
UM– USEKE.RW