Breaking News: Mugesera ahamijwe ibyaha bitatu ahanishwa gufungwa BURUNDU

*Icyaha cyo kuba icyitso gishingiye ku cyaha cyo gushishikariza mu ruhame kandi mu buryo butaziguye gukora icyaha cya Jenoside,

*Icyaha cyo gutoteza nk’icyaha kibasiye inyokomuntu,

*Icyaha cyo kubiba urwango mu baturage ashingiye ku moko.

*Icyaha cyo gucura no gutegura umugambi wa jenoside n’Icyaha cy’Ubufatanyacyaha mu gukora jenoside, ntibyamuhamye.

Mu rubanza Ubushinjacyaha Bukuru bw’u Rwanda bwari bukurikiranyemo Dr Leon Mugesera umaze imyaka isaga Itatu aburana ku byaha bya Jenoside bishingiye ku mbwirwaruhame yavugiye muri ‘meeting’ yo ku Kabaya rifatwa nka rutwisti y’urwango Abahutu bagiriye Abatutsi, kuri uyu wa 15 Mata, Umucamanza yahamije uyu mugabo ibyaha bitatu muri bitanu yari akurikiranyweho amuhanisha gufungwa BURUNDU.

Umucamanza yabanje gusoma imbwirwahame (Discours) Dr Leon Mugesera yavugiye muri ‘meeting’ yo ku Kabaya.

Iri jambo ryafashe iminota 27 risomwa ryumvikanamo amagambo aremereye yumvikanamo gukangurira abari abarwanashyaka ba MRND kwanga, kugendera kure no kwikiza uwafatwaga nk’umwanzi icyo gihe.

Iri jambo ritumvikanamo ubwoko, Umucamanza yavuze ko Mugesera wari Vice President wa MRND mu cyahoze ari Perefegitura ya Gisenyi akaba n’umwarimu muri Kaminuza nkuru y’u Rwanda yarivugiye mu gace avukamo ndetse yafatwaga nk’umuntu ujijutse bityo ko yavugaga rikijyana ndetse ibyo avuze bikumvwa.

Mugesera waburanye adahakana ko yavugiye ijambo muri iyi ‘meeting’, yavuze ko ijambo Ubushinjacyaha bwashyikirije Urukiko atari umwimerere ko ryakorewe amakabyankuru (montage) rigatwererwa Mugesera w’umuhimbano kugira ngo Mugesera wa nyawe yangwe n’Abatutsi.

Umucamanza yagarutse ku buhamya bw’Abatangabuhamya bose bumvise iri jambo imbonankubone n’abaryumviye kuri Radio y’igihugu.

Yagaragaje ko hafi y’aba batangabuhamya bose bahurije ku kuba Mugesera yaragaragaje byeruye ko afitiye urwango Abatutsi (n’ubwo atigeze yerura ngo avuge ubu bwoko) akavuga ko ari abagambanyi ndetse ko bazasubizwa muri Abisnia (Ethiopia) banyujijwe iy’ubusamo muri Nyabarongo.

Ubushinjacyaha bwari bukurikiranye Dr Mugesera bushingiye ku mbwirwaruhame zavuzwe n’uyu mugabo ahantu hatandukanye harimo ku Kabaya, kuri Stade Umuganda n’ahandi.

Umucamanza yemeje ko ‘meeting’ zihabwa agaciro ko Mugesera yavugiyemo ari iyo ku Kabaya n’iy’I Nyamyumba.

UM– USEKE wagiye ubagezaho uko isomwa ry’urubanza ryagendaga

Update: Saa 15h16 – Dr Leon Mugesera ahise ajurira iki cyemezo avuga ko kibangamiye bikomeye uburenganzira bwo guhabwa ubutabera buboneye

Saa 15h04 – Umucamanza yemeje ko icyaha cyo kuba icyitso cy’abakoze Jenoside cyakozwe na Mugesera mu gushishikariza mu ruhame kandi mu buryo butaziguye gukora icyaha cya Jenoside, icyaha cyo gutoteza nk’icyaha kibasiye inyokomuntu n’icyaha cyo kubiba urwango mu baturage Bihama Dr Leon Mugesera.

Saa 14h07 – Urukiko ruhamije, Mugesera icyaha cyo gushishikariza mu ruhame kandi mu buryo, butaziguye gukora icyaha cya Jenoside, Jenoside abinyujije mu mbwirwaruhame ze (iyo yavugiye ku Kabaya n’iy’i Nyamyumba ari na zo meeting urukiko rwavuze ko Mugesera yitabiriye, izindi ngo ubushinjacyaha ntibwagaragaje ibimenyetso).

Rumuhanaguyeho icyaha cyo gucura no gutegura umugambi wa Jenoside kuko mu mbwirwaruhame abo yabwiraga ngo ntaho Ubushinjacyaha bwagaragaje ko bari babyumvikanyeho cyangwa ko bari bazi ibyo ari buze kubabwira.

Saa 13h13 – Urukiko rwemeje ko Mugesera avuga ririya jambo, yashishikarizaga Abahutu kwica Abatutsi.

Agendeye ku buhamya bwatanzwe n’abatangabuhamya baciye imbere ‘urukiko’; umucamanza yemeje ko ubuhamya bwabo buhuza n’ijambo urukiko rwashyikirijwe kuri CD kabone n’ubwo babivuga mu mvugo zabo, ariko mu isesemgura ngo bihura.

Umucamanza yavuze ko nta gushidikanywaho ko Mugesera yashishikarizaga Abahutu kurimbura Abatutsi cyane cyane ko bamwe muri aba batangabuhamya ngo bagaragaje ko nyuma y’iri jambo hari Abatutsi bishwe.

Nk’umutangabuhamya Ngerageze Muhamud ngo yavuze ko nyuma y’iri jambo yiboneye Interahamwe zitoteza Abatutsi zibabaza niba batarumvise ijambo rya Mugesera.

Saa 12h56 – Umucamanza avuze ko amagambo “Inyenzi”, “Ibyitso” n’ “Inkotanyi” byagarukagwaho na Dr Mugesera mu mbwirwaruhame ze, ngo byasobanuraga Abatutsi nk’uko byemejwe n”abahanga batandukanye barimo Dalaire ndetse bikanemezwa mu manza zitandukanye zaciwe n’Urukiko Mpanabyaha rwa Arusha (TPIR) zirimo urwa Akayezu Jean Paul.

Umucamanza yavuze ko aya magambo Mugesera yayakoreshaga akangurira Abarwanashya ba MRND kwirinda aba bantu, ngo yabakanguriraga kurimbura Abatutsi ndetse ngo muri icyo gihe ni zo mvugo zakoreshwaga n’abategetsi batandukanye badashaka kwerura, bakayobya uburari kugira ngo amahanga atamenya ko bafite umugambi wo kurimbura Abatutsi.

Saa 12h10 – Urukiko rwemeje ko ijambo rwashyikirijwe n’ubushinjacyaha ryavuzwe na Mugesera.

Rushingiye ku byatangajwe n’abahanga mu gusesengura imbwirwaruhame bitabajwe mu gusesengura ijambo ryashyikirijwe igihugu cya Canada ubwo Mugesera yaburanaga uburenganzira bwo kuba muri iki gihugu.

Umucamanza yavuze ko aba bahanga bemeje ko iri jambo ari umwimerere kandi ko ridatandukanye n’iryo ubushinjacyaha bwashyikirije Urukiko.

Kare saa 11h07:

*Mugesera yazanywe kuburanira mu Rwanda tariki ya 24 Mutarama 2012 avanywe muri Canada

* “Amahembe ane ya Shitani”, ijambo Mugesera yavugiye muri Kabaya, tariki ya  22 Ugushyingo 1992 rifatwa na benshi nk’iryakanguriye Abahutu gukora Jenoside.

Urukiko rutangiye gusoma urubanza Ubushinjacyaha buregamo Dr Leon Mugesera ibyaha bishingiye ku ijambo yavugiye muri meeting yo ku Kabaya rifatwa nk’iryabibye urwango, rihamagarira Abahutu kwica Abatutsi mu 1992, nyuma bikaza kuvamo Jenoside.

Umucamanza yabanje kuramutsa ababuranyi bigaragara ko abafitiye akanyamuneza.

Umucamanza yabanje kubwira ababuranyi n’abakurikiye iburanisha ko kubera urubanza ari rurerure yabasabye kwihanganira umwanya munini kurusoma biri bufate.

Umunyamakuru Martin Niyonkuru w’Umuseke uri mu rukiko Rukuru akurikirana iki gikorwa, aravuga ko atangiye gusoma imikirize y’urubanza, umucamanza yabanje kwibutsa ko nyuma yo kuvuga iri jambo; Dr Mugesera yashyiriweho impapuro zo kumufata ariko birananirana kuko yari yarahunze igihugu.

Martin NIYONKURU
UM– USEKE.RW