Batatu bakurikiranyweho gufasha kunyereza za miliyoni kuri ‘EBM’ batawe muri yombi

Kuri uyu wa 04 Ugushyingo, Police yataye muri yombi abagabo batatu bakurikiranyweho gufasha abantu kunyereza imisoro ibarirwa muri za miliyoni z’amafaranga y’u Rwanda hakoreshejwe imashini zitanga inyemezabwishyu zizwi nka ‘EBM’. Ngo bafashije abacuruzi kugabanya imisoro y’ukwezi cyangwa ku gihembwe ubundi, bagasohora inyemezabwishyu nta gicuruzwa cyaguzwe. Aba bagabo bafungiye kuri station ya Police ya Kicukiro.

Ikigo cy’igihugu cy’igihugu cy’imisoro (RRA) kivuga ko ibi byaha byakozwe muri aya mezi atambutse y’umwaka wa 2016 n’abandi yo muri 2015.

Umwe muri aba batawe muri yombi, Muyango Cyriake ufite kampani ya ‘Reason Trading’, ari kwishyuzwa imisoro ya miliyoni 76 zanyerejwe muri iyi kampani, yisobanura avuga ko inyemezabwishyu (facture) zasohokaga yibeshye kubera ubumenyi bucye.

Ati ” Icyaha ntabwo nkemera ariko ikosa ndaryemera no kwirengera ingaruka zabyo ndabyemera ariko byabaye mu buryo ntabiteganyaga.”

Avuga ko ababishinzwe bajya bakangurira abacuruzi, kandi bakajya babigira nk’ishingano kuko iyo hatabayeho igikorwa cy’ubujura, habaho no kwibeshya bigatera ingaruka.

Undi witwa Rugwizangonga Jean Claude avuga ko azize umucangamari we kuko yamwizeye akamwegurira ibyo kwishyura imisoro hifashishijwe utu tumashini twa EBM, ntakurikirane ko imisoro yo muri Kampani ye itangwa cyangwa idatangwa.

Ati “ Umucungamari wanjye yagombaga gucunga umutungo wa Company yanjye, ariko abikoresha mu buryo bunyuranyije n’amategeko, nkaba nsaba imbabazi Abanyarwanda kuko inshingano nahawe ntabwo nazikoresheje neza.”

Rugwizangoga Jean Claude avuga ko adakwiye kuryozwa icyaha kuko cyakozwe n’umucungamari we bityo ko ari we ukwiye kuryozwa iyi misoro yanyerejwe muri Kampani ye.

Undi witwa Ribonande Abdulkarimu ufite kampani ya Quality Business Center, anashinjwa kunyereze imisoro muri company ya Rugwizangoga bafunganye, yemera icyaha kuri kampani ye ariko agahakana ko yagize uruhare mu kunyereza imisoro ya kampani y’uyu mugenzi we bafunganye.

Ati “ Hari uburyo umuntu akwaka facture kandi nta kintu yaguze, akagira icyo akugenera kameze nka ka Komisiyo, noneho nawe ukuzungukira kuri iyo komisiyo baba baguhaye, ubwo natwe nta kintu kiba cyagaragaye ni nacyo kigaragaramo uburiganya.”

Umuhuzabikorwa w’umushinga wa EBM muri RRA,  Mbera Emmy avuga ko  aba bantu bafashije abantu kunyereza imisoro y’inyongeragaciro (TVA) ya miliyoni nyinshi.

Agaragaza imisoro yanyerejwe, yagize ati “ Nka Reason Trading, abantu basabye gusubizwa imisoro ku nyongeragaciro ya miliyoni 145 y’amafaranga y’u Rwanda; Quality Business abantu basabye gusubizwa miliyoni 390; mu gihe Beyi Raisi, abantu basabwe gusubizwa  TVA ya miliyoni 210 y’amafaranga y’ Urwanda.”

Izi kampani ariko na zo ngo zisaba kugira amafaranga zisubizwa nka Beyi Raisi isaba gusubizwa miliyoni 39; Quality Business igasaba gusubizwa miliyoni 52. Ati “ Ubwo rero Company isabwa gusubizwa ari uko nayo igiye gusaba ubufasha ku bagenzi be bacuruza izo facture.”

Emmy Mbera avuga ko abari gukurikiranwa bagera muri 25 bagishakishwa, gusa akavuga ko abantu bakomeje kwitabira gukoresha imashinzi za EBM dore ko ubu zikoreshwa n’abagera muri 12 300.

Umuvugizi wa Polisi mu mujyi wa Kigali, Spt Emmanuel Hitayezu avuga ko ifatwa ry’aba bantu babifashijwemo n’abaturage batanze amakuru ko aba bagabo bafite imashini za EBM ariko bazikoresha mu buryo bwo kurigisa imisoro.

Agaragaza icyo bahanishwa baramutse bahamwe n’ibyaha, yagize ati “  Mu gitabo cy’amategeko ahana ibyaha mu Rwanda mu ngingo ya 369, kibahanisha igifungo kiri hagati y’amezi 6 n’imyaka ibiri ndetse n’ihazabu ingana n’umusoro wanyerejwe.”

Spt. Emmanuel Hitayezu avuga ko icyo basaba abaturage ari gutanga amakuru ku gihe nk’uku byakozwe n’aba babatungiye agatoki.

Daddy SADIKI RUBANGURA
UM– USEKE.RW