“Bahati yagize ubutwari, abandi nabo bazihane”- Mike Karangwa

Mike Karangwa umwe mu banyamakuru bakora ibiganiro by’imyidagaduro mu Rwanda, ndetse akaba n’umwe mu bagiye bagaragara cyane mu itorwa rya Miss Rwanda  nk’umukemurampaka “Judge”, ngo yahise ababarira Bahati acyumva ko yamurogesheje.

Ibi bibaye nyuma y’uko umwe mu bahanzi bahoze mu itsinda rya Just Family uzwi nka Bahati atangarije ko bakoreshaga amarozi muri muzika yabo ndetse ko bari banafite urutonde rw’abanyamakuru bari baratanze ku bapfumu ruriho Mike Karangwa ku mwanya wa mbere.

Mu kiganiro na Umuseke Mike Karangwa yagize icyo avuga nyuma yo kumva ko yari yaratanzwe mu bapfumu ngo ajye akunda itsinda rya Just Family.

Yagize ati “Byantunguye kubyumva, ariko kandi nahise mubabarira kuko nawe yemeye icyaha agasaba imbabazi.

Imbaraga z’imyuka mibi zibaho ariko nta garanti zigira icyangombwa ni ugushingira ku mbaraga zitarimo igihombo arizo zitangwa n’Imana gusa.

Bahati yagize ubutwari, abandi nabo nibihane basabe Imana imbabazi kuko imyuka mibi nta nyungu zayo”.

Itsinda rya Just Family ryabarizwagamo abahanzi nka Kim Kizito, Bahati, Jimmy na Croija. Ryatangiye kumenyekana cyane cyane mu mwaka wa 2008 naho mu mwaka wa 2010 Kim Kizito aza kuva muri iri tsinda. Mu mwaka wa 2011 iri tsinda ryaje kwitabira irushanwa rya Primus Guma Guma Super Star.

Kugeza ubu rero abo bahanzi bose uretse Bahati abandi bose ntabwo bakiba mu Rwanda, Jimmy bivugwa ko yaba ari muri Afurika y’Epfo naho Croija akaba ari muri Uganda.

Joel Rutaganda

UM– USEKE.RW