APR FC ku mwanya wa mbere nyuma yo gutsinda AS Kigali 3-1

Mu mukino wari utegerejwe na benshi, ikipe ya APR FC ibashije gutsinda AS Kigali ibitego 3-1 by’agateganyo ifashe umwanya wa mbere.

APR FC yayoboye igice cya mbere, ibona igitego cya mbere cyinjiye ku munota wa gatatu w’umukino, gitsinzwe na  Iranzi Jean Claude acenze ba myugariro ba AS Kigali babiri (Bishira Latif na Kayumba Soter).

Icya kabiri cyatsinzwe na Benedata Janvier ku ishoti rikomeye yatereye hanze y’urubuga rw’amahina, Bate Shamiru ufatira AS Kigali ntiyamenya aho umupira uciye.

Ku munota wa 22, rutahizamu rukumbi wa APR FC muri uyu mukino, Issa Bigirimana nawe yatsinze igitego cya gatatu, ku mupira yahawe na Sibomana Patrick bita Papy wakinaga ku ruhande rw’ibumoso.

Eric Nshimiyimana utoza AS Kigali yakoze impinduka, akuramo Amini Mizerwa wagowe cyane n’uyu mukino, ashyiramo Tuyisenge Pekeyake bita Pekinho.

Byaje gusa n’ibitanga umusaruro kuko Onesme Twizeyimana yatsindiye AS Kigali impozamarira ku munota wa 79.

APR FC yahise na yo ikora impinduka  ikuramo Ntamuhanga Tumaine Tity, ishyiramo kapiteni wayo Nshutinamagara Ismail Kodo, mu rwego rwo kugarira ikoresheje ba myugariro batanu.

Mu minota ine yongewe kuri 90 y’umukino As Kigali ya Nshimiyimana ntiyabashije kwishyura.

Ababanjemo ku mpande zombi:

APR FC: Ndoli Jean Claude, Rusheshangoga Michel, Bayisenge Emery, Rwatubyaye Abdoul, Rutanga Eric, Yannick Mukunzi, Benedata Janvier, Ntamuhanga Tumaine Tity, Iranzi Jean Claude, Sibomana Patrick Papy, na Issa Bigirimana

AS Kigali: Bate Shamiru, Hamdan Bariyanga, Kayumba Soter, Bishira Latif, Janvier Irankunda, Kabura Mhamud, Maboura Akiri, Nsabimana Eric Zidane, Habimana Onesme, Sugira Ernest, Amini Mwizerwa

Amafoto/NGABO/UM– USEKE

NGABO Roben
UM– USEKE.RW