APR FC igiye mu mikino ya gisirikare nta Djamal na Ntaribi

Mu gihe habura umunsi umwe gusa ngo mu Rwanda hatangire imikino ya gisirikare, Kanyankore Gilbert Yaounde utoza APR FC yatangaje urutonde rw’abakinnyi azakoresha, batarimo Mwiseneza Djamal n’umuzamu Steven Ntaribi.

Kuri uyu wa kane tariki 4 Kanama 2016, kuri Stade ya Kigali APR FC yakoze imyitozo ya nyuma mbere y’imihango yo gutangiza ku mugaragaro imikino ya gisirikare iteganyijwe kuri uyu wa gatanu Saa munani z’amanwa (14h00) kuri Stade Amahoro.

APR FC yifuza kwisubiza igikombe cy’umupira w’amaguru muri iyi mikino ihuza igisirikare cyo mu bihugu cyo mu karere ka Afurika y’i Burasirazuba.

APR ijyanya abakinnyi bashya bayo muri iyi mikino, ibintu umutoza wayo mushya Kanyankore Gilbert Yaounde abona nk’ibizabafasha kwitegura umwaka utaha w’imikino.

Ati “Ni imikino ngiye gutoza bwa mbere. Kandi mu bakinnyi banjye, harimo benshi bagiye kuyikina bwa mbere kuko ari bashya muri APR FC. Ni irushanwa ryiza cyane kuri twe. Kuko rizafasha abakinnyi kumenyerana. Nanjye bizamfasha kubona umwanya wo kubumvisha philosophy yanjye. Nizeye ko tuzatangira Shampiyona muri Nzeli twiteguye neza.”

Kanyankore avuga ko baganirijwe n’ubuyobozi bw’ikipe, ngo byabafashije kwitegura mu mutwe ku buryo bifuza kwisubiza iki gikombe nk’uko abo basimbuye babikoze umwaka ushize.

Abakinnyi bashya batari ku rutonde rw’abakinnyi 21 bazakina imikino ya gisirikare ni Ngabo Mucyo Freddy APR FC yaguze muri AS Muhanga, na Mustafa Hassan Omar (murumuna wa Ally Niyonzima) na Nshuti Innocent wazamuwe avuye muri ‘academy’ ya APR FC.

Iyi mikino kandi, APR izayikina idafite Ntaribi Steven uri mu bizami, Mwiseneza Djamal utarakira neza imvune amaranye imyaka ibiri, na Emery Bayisenge uzajya muri Maroc.

Urutonde rw’abakinnyi

1.Mvuyekure Emery
2.Kimenyi Yves
3.Ngabo Albert
4.Rusheshangoga Michel
5.Imanishimwe Emmanuel
6.Rutanga Eric
7.Usengimana Faustin
8.Rugwiro Herve
9.Nsabimana Aimable
10.Yannick Mukunzi
11.Nshimiyimana Amrani
12.Djihadi Bizimana
13.Nkinzingabo Fiston
14.Maxime Sekamana
15.Hakizimana Muhadjili
16.Butera Andrew
17.Benedata Janvier
18.Twagizimana Onesme
19.Itangishaka Blaise
20.Habyarimana Innocent
21.Sibomana Patrick

Roben NGABO
UM– USEKE.RW