Amavubi yatsinzwe na Tunisia U23 ariko ngo yize byinshi

Mu mwiherero ikipe y’igihugu imazemo iminsi muri Maroc yahatsindiwe imikino ibiri ya gicuti yahakinnye harimo n’uwo yatsinzwe kuri iki cyumweru n’ikipe y’igihugu ya Tunisia y’abatarengeje imyaka 23. Gusa ngo bahigiye byinshi bigiye kubafasha kwitegura CHAN izabera mu Rwanda.

Umukino wahuje u Rwanda n’ikipe Olempike ya Tuniziya warangiye Amavubi atsinzwe igitego 1-0. Ni umukino wabereye kuri Maamoura Training Center aho Amavubi yabonye uburyo bwinshi bwo gutsinda ariko Sugira Ernest ntashobora kureba mu izamu rya Ben Hassan Sabri warindiraga Tuniziya.

Olivier Kwizera umuzamu w’Amavubi yagerageje gukuramo imipira myinshi ikomeye ariko ku munota wa 36 Kechride Wajdi yaboneye Tuniziya igitego kimwe cyabonetse muri uyu mukino wa gicuti.

Mu gice cya kabiri, umutoza w’Amavubi Johnny McKinstry yakoze impinduka ebyiri Jean Claude Iranzi asimbura Songa Isaie mu gihe Djihad Bizimana yinjiye mu kibuga mu mwanya wa Yannick Mukunzi.

Ku munota wa 75, myugariro w’Amavubi Usengimana Faustin yabonye ikarita y’umutuku nyuma yo guhabwa iya kabiri y’umuhondo, bituma umutoza akuramo Celestin Ndayishimiye wakinaga inyuma ku ruhande rw’iburyo yinjiza mu kibuga Rwatubyaye Abdul wagiye gukina hagati mu bugarira.

Johnny Mackinstry yatangaje ko ikarita itukura yahawe yamwiciye imibare, gusa nanone ngo afite uibyo kwishimira muri uru rugendo.

Ati “Twabonye ikarita ya kabiri y’umuhondo ya Faustin dusigara turi abakinnyi 10 mu kibuga. Umusifuzi yasifuye n’ibitaringombwa, niko nibwira. Ntibashakaga (abasifuzi) ko abakinnyi bakorana ho cyane, byangije umukino, bituma twe duhabwa n’ikarita itukura dusigara turi abakinnyi 10 mu kibuga ku makosa atagize icyo atwaye.

Ibi hari icyo biza kwigisha abakinnyi kandi navuga ko twakinnye neza mu minota 15 ya nyuma ubwo twashaka kwishyura. Haracyari indi minsi tuzakosora amakosa.”

11 babanjemo ku ruhande rw’u Rwanda bakina na Tuniziya U-23:

Umuzamu: Olivier Kwizera
Abigarira: Michel Rusheshangoga, Celestin Ndayishimiye, Faustin Usengimana, Salomon Nirisarike
Hagati: Yannick Mukunzi, Jean Baptista Mugiraneza, Haruna Niyonzima
Abasatiraga:Jacques Tuyisenge, Isaie Songa, Ernest Sugira

Abasimbuye: Iranzi Jean Claude (Isaie Songa), Abdul Rwatubyaye (Celestin Ndayishimiye) na Djihad Bizimana (Yannick Mukunzi).

UM– USEKE.RW