Amakipe y’i Rubavu ababajwe no kwimwa ikibuga yahawe na Leta

Akarere ka Rubavu gafite amakipe abiri azamura impano nyinshi z’umupira w’amaguru; Etincelles FC na Marines FC. Aya makipe yombi ahangayikishijwe no kubura ikibuga akoreraho imyitozo kuko bimwe uburenganzira ku bibuga bibiri bya stade Umuganda.

Benshi mu bakunzi b’umupira w’amaguru mu Rwanda bita akarere ka Rubavu ‘Brazil’ bashaka kugaragaza ko ari igicumbi cya ruhago kubera kuzamura impano nyinshi harimo aba kapiteni b’Amavubi Haruna Niyonzima na Jacques Tuyisenge.

Aba basore bombi bazamukiye kuri stade Umuganda ariko barumuna babo bakina mu makipe y’i Rubavu Etincelles FC na Marines FC ubu babajwe no kubura aho bakorera imyitozo.

Aya makipe yabuze aho akorera nyamara tariki 4 Mutarama 2016 Leta y’u Rwanda yaratashye ku mugaragaro stade nshya Umuganda ifite ibibuga bibiri bya ‘terrain synthétique’. Nyuma byakoreshejwe mu myitozo n’imikino ya CHAN.

Amakipe y’i Rubavu yahawe ibyo bibuga ngo abikoreshe mu mikino ya shampiyona ariko ubu yarabyambuwe bituma abura aho akorera imyitozo nk’uko Umuseke wabitangarijwe na Nduhirabandi Abdul Karim bita Coka utoza Marines FC.

Coka ati “Njye ndabanza gushimira ubuyobozi bukuru bw’igihugu cyacu bwaduhaye stade Umuganda. Ariko ikibabaje ni uko tuyirebesha amaso gusa. Tuyihabwa amasaha abiri kandi rimwe mu cyumweru. Iyi stade tuyibona nk’abashyitsi. Nta musaruro twakomeza gutanga kandi twarabuze aho dukorera imyitozo. Kuko amakipe yacu abura aho akorera kandi stade ihari. Umwanzuro wo kuyifunga wafashwe nyuma y’imikino ibanza ya shampiyona kandi ntitwasobanuriwe aho byapfiriye.”

Uyu mutoza yakomeje avuga ko ikibuga kiri inyuma ya stade Umuganda Marines na Etincelles FC zagenewe nk’ikibuga cy’imyitozo bigoye kukisanzuramo kuko gikorerwaho n’amakipe arenga 11 kuva saa 08h kugera saa 18h, (Ikipe imwe ntiyarenza isaha mu myitozo).

Amwe muri ayo makipe ni; Etincelles FC, Marines FC, Scandinavie FC (Junior, Senior abahungu, abakobwa), Vision Jeunesse Nouvelle (Junior, Senior), Ishuri ry’umupira w’amaguru rya Gisenyi, n’amakipe atatu y’abasheshe akanguhe.

Umuseke wagerageje kuvugana n’umukozi w’akarere ka Rubavu ushinzwe ibibuga ntiyifuza kugira icyo abivugaho.

Photo: E.Mugunga/UM– USEKE

Roben NGABO
UM– USEKE.RW