Amafaranga ntakwiye kuza mbere y’umurimo – Mgr Mbonyintege

Kabgayi – Mu gikorwa ngarukamwaka cyo kwizihiza  umunsi w’umurimo  cy’abakozi ba  Diyosezi ya Kabgayi Musenyeri MBONYINTEGE  Smaragde  akaba n’umushumba  w’iyi Diyosezi, avuga ko inyungu z’amafaranga zidakwiye kuza imbere y’umurimo ahubwo ko umurimo ari wo ugomba kuza imbere y’amafaranga.

Mu ijambo rye  Musenyeri MBONYINTEGE Smaragde, yagarutse kuri bamwe  mu bakozi  bakunda kwibwira ko  guta akazi  k’igihe kirekire ngo ni uko kaguhembaga make, ukirukira  agahemba menshi ariko gafite amasezerano y’igihe kigufi ndetse gashobora no guhagarara biri mu bishobora gutuma abantu benshi batagera ku iterambere  rirambye.

Ibi Musenyeri MBONYINTEGE yabivuze  ashingiye ku kibazo  cy’abakozi bo mu bitaro by’i Kabgayi batamara  igihe bitwaje umushahara  ngo muke bahembwa ku kwezi ugasanga bahitamo   kujya gushakishiriza ahandi bahemba ayisumbuye.

Musenyeri  asanga  ibikwiye ari gutuza  ugakunda umurimo mbere y’amafaranga kuko  uburyo abantu bashaka amafaranga  hazamo n’irari rituma yifuza kuyagwiza akoresheje inzira nyinshi  zirimo no kuba yayiba  bikamukururira akaga rimwe na rimwe.

Yagize ati: “Kuri ubu abantu bahangayikishijwe no kwigwizaho amafaranga, badatekereza agaciro k’umurimo?”

Musenyeri kandi yongeyeho ko  abantu benshi bahura n’ingorane ari ababa bafashe inguzanyo mu mabanki  zigendeye ku mibare mike yo kuba  bashora ayo mafaranga mu bwubatsi  bw’igihe kirekire aho kuba bayashora mu bucuruzi bwunguka.

Cyakora yatanze inama  ku bakozi batandukanye bakwiriye kuzirikana nubwo ngo zitagendanye n’amategeko  asanzwe y’umurimo mu Rwanda, ariko abakozi bashobora gukuramo isomo rikomeye.

Inama ya mbere  ngo abakozi bari bakwiye kuba bitaho ni ukubaha umurimo kuko kutagira  icyo ukora  bigira ingaruka ku mibereho y’umuntu.

Icya kabiri  ngo ni ukumenya kubaka urugo kuko ngo bituma umukozi abasha kubaha umurimo igihe ageze mu kazi agakora neza iyo nta bibazo yahuye na byo.

Icya gatatu ngo ni ukugira aho utuye  ariko utahagezeho mu buryo bw’inguzanyo  iguhangayikisha, naho ngo icya nyuma ni ukugira  imyemerere ihamye mu idini kubera ko  imyemerere  ifasha kugira umurongo ngenderwaho.

Musenyeri  kandi avuga ko  igishoro ataricyo  cy’ingenzi gishobora kugeza umuntu  ku rwego rw’imikorere yifuza ko ahubwo bisaba gukunda umurimo agiye gukora  atekereza uburyo azawunoza.

Muri iki gikorwa hahembwe abakozi batandukanye  bafite uburambe ku kazi n’abiri muri bo bakoze ibikorwa by’indashyikirwa mu gihe cy’umwaka bahembwe  icyemezo cy’imikorere myiza  giherekejwe n’ibihumbi ijana by’amafaranga y’u Rwwanda buri wese (Frw 100 000).

MUHIZI ELISEE
UM– USEKE.RW/Kabgayi