Amabara afite akamaro kanini harimo no kuruhura umubiri

Amabara atandukanye ari ahantu hadukikije afite uruhare runini ku buzima bwa muntu. Amabara afite ubushobozi bwo  kuruhura no gukangura (relax and stimulate) imikorere y’umubiri  wacu no guhindura imyitwarire yacu (behaviours).

Amabara agira icyo atwara umubiri bitewe n’uko atuma imvubura  z’umubiri  zivubura imisemburo itandukanye ariyo ihindura  imikorere y’umubiri nk’uko byemezwa na Dr. Julian MELGOSA, inzobere mu bumenyamuntu ‘Psychology’ akaba n’umuyobozi wa Walla Walla University, yo muri Leta zunze Ubumwe za America (USA).

Dr.MELGOSA atanga inama yo guhitamo amabara akunogeye bitewe n’icyo wifuza, ukayakwiza mu cyumba, aho ukorera n’ubusitani (garden) ukabutoranyiriza indabo ugendeye ku zifite amabara uzi icyo amariye umubiri wawe.

Amabara agira uruhare ku mubiri wacu mu buryo bukurikira:

UMUTUKU 

Ni  ibara rituma  umubiri uvubura cyane umusemburo witwa Adrenaline, ituma  umuvuduko w’amaraso wiyongera, maze umuntu akagira umwete n’imbaraga nyinshi. Ni ibara ry’ingenzi ku banebwe n’abahorana intege nke ku bw’impamvu zitandukanye. Ngo ni ngombwa kurikwiza aho ukorera.

UBURURU

Ni ibara rikora ikinyuranyo cy’umutuku, kuko rituma umubiri uhagarika kuvubura Adrenaline, maze bikagabanya umuvuduko w’amaraso, umubiri ugakorana imbaraga nke. Ni ibara ry’ingenzi ku muntu ushaka kuruhuka, uribwa umutwe n’unaniwe kujya ahantu akikijwe n’iri bara.

ICYATSI

Iri bara ni imvange y’ubururu n’umuhondo.  Ni ibara rusange ry’ibimera, rifasha umuntu kuruhuka neza kandi rirwanya umunaniro (antidote against stress).

UMUHONDO

Bitewe n’uko umuhondo ushashagirana, ni ingenzi ku muntu wihebye ufite agahinda cyane. Ni byiza cyane ko ngo igihe wihebwe wajya wigira mu cyumba gisizemo iri bara, cyangwa ukajya mu busitani burimo indabo z’umuhondo.

ORANGE

Iri bara ni imvange y’umutuku n’umuhondo. Naryo rero rituma umuntu akorana umwete, ariko anezerewe cyane kubera umuhondo. Ndetse ngo rinatuma  ibintu ubikorana icyizere.

UMWERU

Umweru ugizwe n’amabara yose ku buryo bungana. Rero urwo ruhurirane rutuma, umweru  utera umubiri kwiyoroshya, kugira impuhwe n’ubunyangamugayo.

UMUKARA

Umukara ntubarwa nk’ibara. Umukara wo urihariye kuko utera kugubwa nabi ndetse n’umunaniro. Dore ko  hari benshi bawuvuga nk’ikimenyetso cy’ikintu kibi.

MOVE  (PURPLE)

Iri  bara rikoreshwa kenshi cyane nk’ikimenyetso cy’akababaro no gutuza cyane. Ritera gutuza, gukurikira cyane (concentration), no kwibuka cyane.

Dr.MELGOSA, yemeza ko amwe mu mabara ari umuti n’urukingo bidasubirwaho.

Ni ingenzi kwihitiramo ayo gusiga mu byumba by’aho dutuye n’aho dukorera. Ndetse tugatera indabo z’amabara twihitiyemo mu busitani bwacu.

Source: Positive Mind cya Dr. Julian MELGOSA

MAHIRWE Patrick
UM– USEKE.RW