Abikorera bakwiye kubyaza umusaruro ubutaka dufite ku cyambu cya Djibouti-Kagame

Kuri uyu wa gatandatu mu kiganiro n’abanyamuru cyasoje uruzinduko rw’iminsi ibiri Perezida wa Djibouti Ismail Omar Guelleh yarimo mu Rwanda, Perezida Paul Kagame yasabye Abanyarwanda by’umwihariko abikorera kubyaza umusaruro ubutaka bwa Hegitari 20 u Rwanda rufite ku cyambu cyo muri Djibouti.

Mbere y’ikiganiro n’abanyamakuru, Ikigo cy’igihugu cy’iterambere RDB n’urwego rushinzwe icyambu cya Djibouti (Djibouti Port authority) basinye amasezerano azafasha u Rwanda mu kubyaza umusaruro icyambu cya Djibouti, by’umwihariko ubutaka bwa Hegitari 20 Djibouti yahaye u Rwanda mu 2013.

U Rwanda kandi rukaba narwo rwashyikirije Djibouti ibyangombwa by’ubutaka bwa Hegitari 10 rwabahaye mu gice cy’inganda cy’Umujyi wa Kigali (Special Economic Zone).

Nyuma yo gusinya ariya masezerano, Perezida Paul Kagame yabwiye abanyamakuru ko ariya maserano ndetse n’uruzinduko rwa Perezida Djibouti Ismail Omar Guelleh ngo bigaragaza umubano mwiza hagati y’ibihugu byombi.

Yagize ati “Tunejeje no gukomeza gukorana n’abavandimwe bo muri Djibouti, no gukomeza imikoranire y’akarere ka Afurika y’Iburasirazuba bishingiye ku bikorwa binyuranye bigiye kuba (mu minsi iri imbere) n’umubano dufitanye.”

Avuga ku buryo ubutaka Djibouti yahaye u Rwanda bwabyazwa umusaruro, Kagame yavuze ko hari imirimo myinshi yakorerwa kuko ari ubutaka buri kucyambu kiri ku nyanjya, kandi bwegeranye n’izingo ry’Uburasirazuba bwo hagati, ibihugu by’abarabu n’isi muri rusange.

Yagize ati “Djibouti iri ahantu heza, ku nyanja, kandi dukora ubucuruzi n’ibikorwa byinshi binyura mu nyanja, buriya butaka rero turamutse tubukoreshejwe neza bwadufasha muri byinshi.”

Kagame yavuze ko buriya butaka bwa Hegitari 20 bushobora kunyuzwaho ibicuruzwa biva cyangwa biza mu Rwanda.

Yavuze ko buramutse butunganyijwe neza, hajya hakirirwa ibicuruzwa bije mu Rwanda, hanyuma indege zikabipakira zikabizana, bityo igihe ibicuruzwa byamaraga mu nzira kikagabanyuka. Gusa, ngo birasaba ko hatezwa imbere ubwikorezi bw’imizigo mu ndege.

Ati “Turashaka ko urugaga rw’abikorera rufata iya mbere, Guverinoma izaza nk’umufatanyabikorwa muri ibi bikorwa,…hakomezwa imikoranire hagati ya Guverinoma y’u Rwanda n’iya Djibouti, n’inzego z’abikorera z’ibihugu byombi.”

Ku rundi ruhande, Perezida wa Djibouti, Ismail Omar Guelleh yavuze ko yanejejwe n’ibiganiro ku mishinga n’imikoranire mu nzego zinyuranye cyane cyane iz’ubukungu.

Minisiteri z’ububanyi n’amahanga z’ibihugu byombi kandi nazo zasinye amasezerano y’imikoranire muri rusange, ngo azakurikirwa n’andi masezerano yihariye mu rwego rwo gushimangira ubufatanye bw’ibihugu byombi.

Photo: Urugwiro

Vénuste KAMANZI
UM– USEKE.RW