Abasirikare b’u Rwanda bari Juba bakomerekeye mu mirwano

Imirwano ya hato na hato ikomeje gushyamiranya ingabo zo ku ruhande rwa Riek Machar n’iza Perezida Salva Kiir mu ijoro ryakeye yageze ku kigo cy’ingabo ziri mu butumwa bwo kugarura amahoro muri Juba, habaho kurasana kwaguyemo umusirikare wo mu Bushinwa abandi barakomereka harimo n’abo mu Rwanda.

Ibisasu bya Mortar nibyo byarashwe ku ngabo za UN, byica umusirikare w’umushinwa binakomeretsa benshi. Hari mu masaha y’ijoro mu mujyi wa Juba.

Minisiteri y’ingabo mu Bushinwa yasohoye itangazo ko imodoka y’ingabo za UN yarashweho igisasu cya Mortar ubwo yariho icunga umutekano w’inkambi y’impunzi hafi y’ibirindiro by’ingabo za UN mu murwa mukuru Juba.

Mu bakomeretse batatu ngo bakomerewe cyane.

Uruhande rw’ingabo z’u Rwanda rwatangaje ko abasirikare babiri b’u Rwanda bakomereye muri iyi mirwano ariko ku buryo bworoheje. Bwemeza ko ntawapfuye.

Kuwa gatanu nibwo imirwano yatangiye hagati y’abarinzi ba Perezida Kiir na visi Perezida Riek Machar, abantu 150 nibura bahise bagwa mu mirwano.

Uyu munsi aba bagabo bahise bahurira ku biro bya Perezida basaba ko imirwano ihagarara.

Habayeho agahenge kuwa gatandatu ariko ku cyumweru imirwano yongera kubura hafi y’ikigo cya gisirikare kirimo ingabo zo ku ruhande rwa Machar iza no kugera ku birindiro by’ingabo za UN ziri mu butumwa bw’amahoro i Juba.

Abayobozi muri UN batangaje ko umwe mu ngabo za UN w’Umushinwa uri mu butumwa muri Sudan y’Epfo yitabye Imana abandi benshi b’Abashinwa n’Abanyarwanda bagakomerekera mu mirwano yaraye ibaye.

Rueters ivuga ko Akanama k’Umutekano k’Umuryango w’Abibumbye kategetse ko ibice biri kurwana muri Sudan y’Epfo bishyira intwaro hasi bigahagarika ibikorwa bibi biri gukorwa.

Mu itangazo ry’aka kanama riravuga ko banenze cyane kuba ku kigo cy’ingabo za UN habereye imirwano mu gihe izi ngabo ngo zagiyeyo nk’igisubizo.

Kuva kuwa gatanu biravugwa ko abantu babarirwa mu magana bamaze guhitanwa n’imirwano hagati y’ingabo za Riek Machar na Salva Kiir.

Buri ruhande rurashinja urundi kuba ari rwo rwashotoye ibirindiro by’urundi, gusa ntibavuga uko imirwano yageze ku kigo cy’ingabo ziri mu butumwa bw’amahoro kugeza ubwo na zo bibaye ngombwa ko zihagararaho.

Chantal Persaud Umuvugizi wa UN muri Juba yavuze ko imirwano imaze kuba kugeza ubu yatumye abantu amagana bahungira mu bigo bya UN.

Persaud ashinja Salva Kiir na Riek Machar kuba ari bo nyirabayazana b’imirwano kuko batubahiriza amasezerano y’amahoro basinye umwaka ushize arimo guhagarika imirwano no kutagira ingabo mu murwa mukuru Juba.

UN yasohoye itangazo ryamagana imirwano yabaye ku kigo cyayo, USA yo yasabye abakozi bayo badakenewe cyane kuri Ambasade yayo i Juba kuba batashye.

Kompanyi y’indege ya Rwandair yabaye ihagaritse ingendo zayo zerekeza i Juba kuva kuri iki cyumweru kubera iyi mirwano ihari.

Rwandair yasohoye itangaz ko ikomeza gukurikiranira hafi iby’imirwano iri kubahera ikazamenyesha iby’ingendo zayo hagati ya Kigali na Juba aho isanzwe ijya inshur enye mu cyumweru.

UM– USEKE.RW